Epangelo Otali Tula Egandjo lyOmeya gOkomikunda Miikaha yOmalelo gOpaitopolwa

0
6

WINDHOEK

Uuministeli wUunamapya, Omeya nOmakuti oshiwike sha zi ko owa tamekele negandjo lyomauyelele oshowo oonkundathana miitopolwa shi nasha negandjopo lyiilonga yomayakulo gegandjo lyomeya kiitopolwa yokomikunda.

Shika osha holoka konima sho Okabinete mesiku lyotango lyaAguste ka zimine egandjopo lyomayakulo gomeya gokomikunda moNamibia.

Elunduluko ndika enene lya holoka moombelewa nomayakulo gepangelo oli li oshizemo shOveta yomumvo 2000 yi nasha nEhedhitho lyOmayakulo kOshigwana (Decentralization Enabling Act of 2000) ndjoka tayi utha egandjopo lyiilonga nomayakulo galwe guuministeli komalelo gopaitopolwa oshowo omalelo goondoolopa. Metine lya zi ko, aanambelewa yuuministeli oya talele po Elelo lyOshitopolwa shErongo nokukundaneka paufupi ookansela kombinga yetokolo lyOkabinete shi nasha negandjopo lyegandjo lyomeya gokomikunda. Omunambelewa Omukuluntu gOshitopolwa Erongo, Linus Garoeb, okwa kundaneke oshifo shika kutya oshigongi shoka shesiku limwe pokati kUuministeli wUunamapya, Omeya nOmakuti pamwe nookansela osha gongalele moSwakopmund. Pomutumba ngoka ookansela oya pewa omauyelele nkene omukalo gwegandjopo lyiinakugwanithwa/omayakulo komalelo gopaitopolwa tagu ka tulwa miilonga. Aanambelewa wuuministeli okwa li wo ya tsakanene nookansela yomondoolopa yaKaribib.

Garoeb okwa pandula osheetwapo shoka, ta ti otashi ka egulula omiyelo dhomakwatathano pokati kelelo lyopashitopolwa nuuministeli mbuka. Okwa gwedha po kutya osheetwapo shoka otashi ka gandja wo ompito kookansela ya holole omaiyuvito gawo oshowo iiyetwapo yawo shi nasha niinima ya guma egandjo lyomeya. Oombelewa oonene dhegandjo lyomeya gokomikunda moshitopolwa Erongo odhi li moKaribib, nopauyelele waGaroeb, aaniilonga itaya ka ninga we haya lopota koombelewa kOvenduka ihe omombelewa yopashitopolwa. Garoeb ota ti ehedhitho lyomayakulo koshigwana itashi ti iilonga mbika otayi ka hula po, ndele otashi ti ombelewa yopashitopolwa oyo tayi ka kala netonatelo lyaaniilonga.

Iitopolwa yokomikunda moshitopolwa shoka oya kwatela mo ngaashi; Uis, Okombahe, Omashete, Otjimbingwe, Karibib nOmbaye yokomikunda. Omeya oge li onzo ya pumba noonkondo moshitopolwa, onkee egandjo lyomeya unene kiitopolwa yokuushayi otashi kala eshongo enene, Garoeb ta ti.

Pamulandu omupe, Garoeb ta yelitha, otapu ka kala hapu ningwa iigongi okugandja omishangwahokololo dhi nasha neyokomeho lyomukalo nguka.

Omulanduveta gwehedhitho lyomayakulo koshigwana ogwa tulilwe miilonga kEpangelo momumvo 1998 nelalakano enene okugandja po iinakugwanithwa noonkondo komalelo gopaitopolwa noondoolopa. Mokuninga ngeyi, omayakulo niilonga otayi kala nokuungaungwa nayo pandondo yopashigwana. Omukalo nguka ogwa nuninwa oshigwana shokomikunda shoka shi li moluhepo shi vule okulikola mo omauwanawa mokuyambula po uudemokoli, ewiliko ewanawa oshowo elongitho lyoonzo dhomomikunda/iiitopolwa.

LEAVE A REPLY

Please enter your comment!
Please enter your name here