Vaporosi Tavagwanako Nombwa Mbali

0
4

MoVenduka-Montumwaraka zawo ezi vageve vaporosi asi kapi vanakara nonombwa ndi asi vanahepa nombwa dokukona-konesa.Sivike seesi tuna kara hamutjangagona kokabinete Steve Katijuanjo nepata lyendi kavatokwere kugavako nombwa mbali dikavatere vaporosi mokurugana sirugana sawo.

Katijuanjo katokwere kugavako nombwa mbali dina kara makwedi gane zongara nezizonkadi.Nombwa edi kaditambwire Deputy inspector General govaporosi James Tjivikua kembo lyendi korukanda rwaOlympia moVenduka.Uhwi ou kauwizire morwa kutunda tupu apa vatuliremo vaporosi ezwi asi kapi vana kara nonombwa dokuvhura kukona-konesa mokwedi kwaMurongankuru mvhurav zeezi.Ano nombwa edi tadi kaza vakadideure mokudiruganesa vaporosi.

Nombwa edi vahepa kudideura mokufumbwira noboma ntani mokutakamesa vakurona vemepangero unenepo presidente gosirongo,novadinguli vamwe vanemakuto.Ose twamwene ehundiro eli yipo katumwene asi twahepa kuvatera vaporosi mokuvapako nombwa mbali.

Ose kwadimona asi nombwa edi dakotoka yipo tuna kugazara asi morwasinke natupira kudigava divatere muhoko.Ose nare tuna kara nonombwa mbali kembo yimo ana kutanta mugolikadi gwaKatijuanjo,apa kavamupulireko wosayitunga zaNew Era.Nampili ngomu asi vantu kwaruganena kumwe mokulimburura kezwi eli vaporosi kuna hara tupu nombwa ntatu tupu yido navavhura kukadeura kevango lina ava dewire nombwa.Ano nombwa edi vana hara kuna kara Malinoi Shepherd,German Shepherd ntani Labrador yido nombwa vanahara.

Apa katambwire ogu kakarererepo vaporosi katente asi nombwa edi vanagava vembo lyoKatijuanjo nadivatera nsene asi vadideura.Ose nare twagwanako nombwa ntatu kovantu edi tuna kugazara asi kuvhura kudideura.Eyi kuna kumoneka asi sirongo saSuid Afrika naso kuna hepa nombwa dangesi nampili ngomu sakara asi yiso sirongo asi deura nombwa.Moyirongo nayinye yaSADC kuna karamo udigu wonombwa edi.

Ose nkenye apa kuranda nombwa edi koSuid Afrika,ano ngesi kapi vana kurandesa hena morwa kuna kuyadiruganesa komarumbasano gombara zokusanga ezi zina kuyakarako zouzuni momvhura ozo,yimo ana kutanta Inspector govaporosi Piet Steenkamp ogu adeura nombwa odo.

Nombwa mbali edi tuna gwana koKatijuanjo tadizi ngesi kedeura,yipo vakadironge kufumbwire.Sirongo esi kuna sitamba erandeso mapangwe yipo asi twahepa nombwa odo.Nombwa odo kuna dihara uzuni naunye,yipo asi udigu kudigwana.Vantu kugazara asi vaporosi kuhepeka nombwa nye kapisi yimo yakara ngoso.Ose kapi atutarerere nombwa detu kudirera nawa siruwo nasinye.Komeho oko tatukadeura nombwa detu kevango lyakara pepi naGobabis,momukunda gwaOmaheke.Komeho oko tuna yuka Namibia ngagwana nombwa damwene dokuruganesa ntani hena kuvhura kudirandesa koyirongo yaSADC.

LEAVE A REPLY

Please enter your comment!
Please enter your name here