MoCaprivi Oye Li Muumbanda wOmukithi gOshiligalala

0
9

KATIMA MULILO

Aakwashigwana moshitopolwa shaCaprivi oye li muumbanda konima sho mwa kundanwa kutya oondohotola mOshipangelo shEpangelo moKatima Mulilo odha konakona iiponga iyali yi nasha nomukithi goshiligalala. Shika osha ningwa konima sho iiningwanima yomukithi nguka ya lopotwa oshiwike sha zi ko okuza moshitopolwa Oshikoto moNooli yoshilongo. Omukithi goshiligalala ohagu etwa kombakiteli ndjoka hayi dhenge oshitopolwa shimwe shuuluwi nohagu endele pamwe noshipwatagula noshigombo, okukala nolwaga kuuyelele nosho tuu, nomaukwatya ngaka ohaga vulu okufala sigo omeso.

Oshigwana otashi indilwa shi kotokele omandhindhiliko ngaka nokuya mbala koshipangelo shi ka mone epango. Pauyelele wOmunambelewa Omukuluntu gUunamiti mOshipangelo shEpangelo moKatima Mulilo, Dr. Simasiku Kabanje, omukithi goshiligalala ogwa monika maavu yaali ya za komukunda Sachinga ngoka gu li ookilometa 60 muuninginino waKatima Mulilo.

Ndohotola ina dhina ompito omukithi nguka gu kale gwa taandela moshitopolwa ashihe. Kakele kwaashika, Kabanje oti indile oshigwana shi ngungumane oshoka aanambelewa yopaunamiti oya tumwa nale moshitopolwa ashihe ya ka ninge omakonakono kushoka shi li po nokumona kutya omukithi nguka ogwa taandela shi thike peni sigo oompaka.

Omukithi nguka pauyelele waKabanje ohagu etithwa kombakiteli yedhina Nisseri Meningitites ndjoka hayi vulu okutaambathanwa okuza momuntu gumwe nokuya momuntu omukwawo okuziilila mombepo yokufudhila mo, iikunguluki yolutu uuna omuntu a yi mekwatathano noshilalo.

Paempito dhimwe, omukithi ohagu vulu okutaandelithwa okupitila miilyo hayi endele ombepo yokufudha unene muunona mboka tau ehama omikithi dha kwata oombululu dhomayulu.

Oshikunguluki ohashi yi ihe mesipa lyomugongo nokweetitha eyonauko kuuluwi. Omukithi goshiligalala ohagu taandele unene neendelelo miitopolwa moka mu na aantu oyendji noonkondo, oshowo omahala ngaashi oosikola, omihandjo noombashu moka mu na aantu oyendji ye li momakwatathano gayooloka.

Oshiligalala ohashi vulu okupangwa nomiti dhoka dha nuninwa omukithi nguka. Ngele omukithi ogwa fekelwa moshitopolwa shontumba, otagu vulu okukeelelwa okupitila metuntilo. Ndohotola ota ti oshipangelo oshi li momalongekidho okutuntila aaniilonga ayehe yuundjolowele moshipangelo shika, noku na etimwaumbwile kutya etuntilo olyo awike ekandulopo lyomukundu kumboka tashi vulika ya kwatwe omanga taya gandja epango nomayakulo kaavu mboka ye na omukithi nguka.

“Pethimbo ndika inatu ninga natango etokolo okuninga omatuntilo moshitopolwa ashihe” Kabanje ta ti nokuyelitha kutya molwaashoka oshitopolwa shaCaprivi oshi na aakwashigwana ye li 90 000, netuntilo okwa li ashike li na okuningwa ngele aantu yatano gomaantu eyovi oya kwatwa komukithi. Iikonga yepashulo nendungiko kombinga yomukithi nguka oya tamekwa nale momikunda okupitila moradio NBC melaka lyOshilozi.

SHARE
Previous articleLocal SME Enters Angolan Market
Next articleHello Ghana

LEAVE A REPLY

Please enter your comment!
Please enter your name here