Hagekeni Kuruganesa Vaduni Mepuko,yimo Ana Kutanta Nguuru Gomukunda

0
10

MoGobabis-Nguuru gomukunda Omaheke Laura Macleod kahundilire vaNamibia vahageke kuruganesa vaduni epuko ndi asi kuvakuta nye nokuvafutasi.Age kauyungire eyi pehoreko lyovaduni kavasikire koyimpu murongo nayivali mosondaha,momukunda gwina.Vaduni kwava tamba unene ruhepo nonzara ntani epiro yirugana.Yininke nayinye eyi kwayiretesapo unene vantu ava ava kutu vaduni nye awo nokumufutasi.Age kahundilire asi yininke yangesi yahepa tupu kuhaga ava vana kuyirugana vahageke ngesi.Mwahaninkiliramo muhoko ogu gomusesu moNamibia.

Ame kuna kuhundira vanafarama ava vana kuruganesa vaduni vahana kuvafuta asi vahageke vaduni kapisi vapika vetu,vahepa kuvafuta moomu ava futu nkenye murugani.Kuna kumoneka asi vanafarama ava kapi vatjangesa vaduni ava komberewa ezi vana kutumbura asi zoSocial Security Commission eyi yina kumoneka asi kuna kulirwanesa noveta zosirongo zovarugani.Eyi kuna kutwaredera vaduni vapire kugwana mauwa ngwendi nsene vana fisa,nsene kuna kara nomarutu gavali ndi vagwane uhaku moomu tupu ava ugwana vakwawo.Nsene kapi ono tjangesa varugani woge ove ngoso kuna kulirwanesa noveta,tjangeseni varugani veni,yiyo kahundilire ministeli zovarugani ziyitarurure eyi.Simwe sina kuhoroka asi vantu ava kuna kuyavazuguma konontere donzira nsene tavere ndi kapi ana kuvhura kurugana.Awo kuna kuyavazuguma vahana yuma nampili mfuto zawo ezi varuganena.

Vagavi yirugana vahepa kusikisamo eyi yavatumbukira mokutekura varugani vawo.Age kakakere hena posilika sokugava nonguwo 20 nomatarase 20 aga kageve nkuruministeragona,dokotora Libertina Amathila.Nguuru kapandwire elikwamo lina nokutanta asi eyi yininke yoyiwa kuvhura kuvatera vaduni nawo vahamene monkarapamwe.Nonguwo edi dina wiza posiruwo sosiwa edi dina gendi mongendeseso zoprojeka ezi ana kugendesa nkuruministeragona.Nonguwo edi tadi popere vanona ava ava dimbire posure zaEiseb Block Primary ano vanona 40 yiwo vana kugwanenamo uwa.

Ogu katambwire uhwi ou kansela gomoOmaheke Mati Ndjoze katente asi vaduni yiwo simpe vana kara vantu woruhepo unene mosirongo esi.Eyi nayivavatera unene,unene posiruwo esi sokufu.Apa kavamene moGobabis nkuruministeragona katwikilire norugendo rwangoso koEpukiro 10.Yivike yivali yina pitipo vaduni womoKalahari,Steinhausen naAminuis kavagwene uhwi wangesi.

LEAVE A REPLY

Please enter your comment!
Please enter your name here