Ombameno Yatjitua iyo Ohendekere Yehi

0
10

OTJOMUISE

Okuhina omasorero mokutuna omahanununino omakuru wehi ngaa ye hendeke motupa otuingi tua Africa kwayeta ombameno pokati kovivara na mopolotika nu wina aku rimbike omekurisiro wombwiko.

Indi eehi rokongotue rombongarero ondenga owonge youmune nohonge momuhunga wehi wa Africa kehi komanene ndjautire Oritjatatu motjihuro ohongora tja Namibia. Oyo oyo kutuapo omuhunga omuparanga worukondua aruhe. Ongondjero indji pokati ko Ruwano rwa Africa, Okomisi yOmuhiko Omikutasane yOmbwiko nOmbaanga ya Africa yOmekurisiro puna Otuwano Tuombwiko Tuotukondua, iri motjiungura tjo ku tuapo omirari nomyano vyomuhunga wehi mo Africa okuvatera omahi ounepo okupaimisa omamemeno womuhunga wehi no matuiiro wawo mo maunguriro. Ovaungure vozohoromende okuza komahi 13 yOruwano Romekurisiro Wombwiko yOmahi wa Africa Kehi, o South African Development Community (SADC), otutu tuovature, otutu tuovatuta ovatjiue nawina ovazapamwe mo mekurisiro veri pombongarero yomayuva yetatu ndjimaiyanda ndinondi.

Tjapatururire ombongarero indji, o Ministera yOmahi nOmahandurisiro, Jerry Ekandjo, watjere komaandero wayo ombongarero indji maivatere epango indi motjiungura ihi okuurisa ozondando raro ohunga no muhunga wehi na mbimauhepa morukondua no kutja moruyaveze orusupi owo ma u hitasana vi kuna omuhunga omupe wehi we koverwahi ra Africa. “Ondando onene yotjirwa tjongutukiro yari okukambura ozomburo azehe zehi novyungurisiwa momake. Mozomburo inda muna ehi ndiri otjipaturure komekursirio wotjiwana nombwiko. Otjirwa tjetu munao otji tjari atja hungama no kukambura ehi retu nda kamburwa momyano ovihina yaye no vi hina oundu,” eye watjere.

Ekandjo wanunisire kutja omauzeu nozondjuriro ndatjama komahanununino wehi yehanika okuza kehi nehi morukondua. Tjima tjiundjirwa kombongarero indji okuya nomwano umwe no mupwe ku avehe mokutara mouzeu wehi.

LEAVE A REPLY

Please enter your comment!
Please enter your name here