Ewawa lyOomeme yoSwapo Lya Kondema, NSHR, Ya Nangolo

0
8

WINDHOEK

Ewawa lyOomeme yOngundu yoSwapo metiyali olya nyana nokukondema nayi oonkambadhala dhEhangano lyOpashigwana lyUuthemba wOmuntu moNamibia (National Society for Human Rights – NSHR) okupangulitha Omukokoli-presidende Dr. Sam Nujoma kOmpangu yUuyuni shi nasha nomiyonena dhoka aniwa a ninga omanga oshilongo inashi manguluka oshowo konima yemanguluko lyaNamibia.

Petrina Haingura ngoka e li AmushangaNdjayi gwEwawa lyOomeme yongundu okwa nyana oNSHR poshigongi shiikundaneki metiyali, ta ti oonkatu dhomukuluntuwiliki gwehangano lyuuthemba womuntu, Phil ya Nangolo otadhi etitha “omakuyunguto nevundakano moNamibia.”

Haingura ota ti oonkatu dhoNSHR okugandja omukanda galyo kOmpangu yIikulumuna yOpauyuni odhi li ompinge nomalalakano gedhiminathanopo lyopashigwana oshoka omaihumbato ngoka otaga tolokana iilalo ya aluka nale.

“Otwa tala ko onkatu ndjika yoNSHR pamwe naalongelikumwe nayo ongonkambadhala okweeta iita nomakuyunguto moNamibia.

“Ongoomeme yoshilongo shetu, otwa lila nale omahodhi ogendji monakuziwa na inatu ilongekidha nokupitika nando nando ehangano lyontumba tali yambidhidhwa pashimaliwa kaazayizayi nelalakano okuhalakanitha ombepo yombili, engungumano nuukumwe wopashigwana,” Haingura ota ti.

Ehangano lyOpashigwana lyUuthemba wOmuntu momukanda gwalyo gomaindilo kOmpangu yUuyuni, otali ti oli na uumbangi kutya omusamane Sam Nujoma pamwe naawiliki yalwe aakuluntu moSwapo oya dhana onkandangala yi nasha nomaso nomakano gAanamibia omayovi.

NSHR oya hala unene Omupresidende goSwapo, Dr. Nujoma, oshowo ngoka a li nale Ominista yEgameno Minista Erkki Nghimtina, ngoka a li nale Omukuluntu gOmatanga, LeitenandaNdjayi Solomon “Jesus” Hawala oshowo ngoka a li nale Kolonela Thomas Shuuya goNDF ya ningilwe omakonakono opo ya pangulwe shi nasha nokulongekidha, okuyambidhidha nokupulana shi nasha nokukana kwaantu ye vulithe 4 200 omanga oshilongo inashi manguluka oshowo konima yemanguluko lyaNamibia.

Ewawa lyOomeme olya gwedha komawi ogendji mongundu yoSwapo ngoka taga nyana nokukondema oNSHR oshowo Ya Nangolo sha landula komapopyo gaAmushangaNdjayi goSwapo, Ngarikutuke Tjiriange, omuwiliki gwEwawa lyAagundjuka moSwapo, Elijah Ngurare oshowo omunambelewa omukuluntu gwEhangano lyAaniilonga moNamibia (NUNW) Evilastus Kaaronda.

Haingura okwa tseyitha wo kutya iilyo yewawa lyoomeme yongundu yawo otaya ka hangana nengathithi enene ndyoka kwa dhiladhilwa li ka ninge ehololomadhiladhilo eti 21 Aguste 2007 li li ompinge nosheetwapo shoNSHR. Ehololomadhiladhilo otali ka longekidhwa kEwawa lyAagundjuka yoSwapo.

LEAVE A REPLY

Please enter your comment!
Please enter your name here