Oohamushanga Aakuluntu mUuministeli Ya Lundululwa

0
6

WINDHOEK

Ombelewa yOmuprimaminista mOmaandaha oya tseyitha elundululo lyoohamushanga omulongo ongomukalo gokupendula po omayakulo niilonga ya ndjunguka noyongushu. Poshigongi shoka sha gongalwa koohamushanga aakuluntu pamwe noominista dhawo oshowo Omupehaprimaminista Dr. Libertina, Amathila, Omuprimaminista Nahas Angula ota ti oohamushanga mbaka oya tamekele iinakugwanithwa yawo mesiku lyotango 1yaAguste 2007.

Elundululo ndika olya etitha Amushanga Omukuluntu mOmbelewa yOmuprimaminista Steve Katjiuanjo a ye kUuministeli wUuyuuki nOmbelewa yaHahendeNdjayi gwEpangelo. Katjiuanjo okwa kutha po oshipundi shaLidwina Shapwa ngoka a lundululilwa kUuministeli wOmavi nOmatulululo.

Amushanga mUuministeli wOmavi nOmatulululo, Frans Tsheehama oku li ngashingeyi kUuministeli wOohi nOonzo dhOmefuta, omanga ngoka a li amushanga gawo, Nangula Mbako a ninga amushanga omukuluntu mOmbelewa yOmuprimaminista. Dr. Malan Lindeque gUuministeli wOmidhingoloko nOmatalelopo okwa tulwa kUuministeli wIipindi nIikwafambulika, omanga Andrew Ndishishi ngoka a kala ko a tumwa kUuministeli wUunamapya, Omeya nOmakuti.

Kahijoro Kahuure ngoka a kala amushanga ta kalelele mUuministeli wUunamapya okwa ya kUuministeli wUundjolowele nIilonga yOnkalonawa, omanga Kalumbi Shangula a ka ninga amushanga omukuluntu mUuministeli wOmidhingoloko nOmatalelopo.

Loine Katoma gUuministeli wOmauyelele nOmatumomawimombepo okwa falwa kOkabinete omanga Mbeuta Uandjarakana a ya pehala lyaKatoma.

Omuprimaminista Nahas Angula ota ti elundululo ndika inali talika ko nando ongomukalo gokugamena oohamushanga mbaka, ihe oshi li onkatu yotango mepangelo okushilipaleka enawapaleko nependulopo lyomayakulo gongushu noga nuka po mombelewa kehe yepangelo.

“Oohamushanga otaya ka kala nokutalwa pailonga yawo mbyoka tayi ka utha ngele oondondo dhomayakulo ngoka ga ziminwa odha ndopoka, oshowo kutya omalalathimbo ngoka ga tulwa po oga gwanithwa po,” Omuprimaminista Angula ta ti. Ota ti ongaanambelewa aakuluntu, oohamushanga otaya ka longela kumwe noominista dhawo opo ya ninge omatokolo ge nasha niilalakanenwa yopashigwana ya guma omahumokomeho.

Okwe ya indile ya lundululile omashongo omape ngoka taya ka adha moombelewa dhawo oompe noku ga ninga oompito dhenawapaleko.

Osheetwapo shelundululo lyaanambelewa osha pumbiwa okunawapeleka nokupendula po egandjo lyomayakulo ga nuka po nogongushu.

Angula ota ti omawiliko ogendji ogi itula momagandjombedhi pehala lyokukala mombepo yokulalakanena uupondoli.

“Omupresidende Hifikepunye Pohamba sho a yi koshipundi konima yoomvula mbali netata, okwa tsu omuthindo ewiliko lye li lalakanene iilonga yongushu noyuupondoli oshowo omayakulo ga ndjunguka koshigwana,” Angula ta ti.

Epangelo olya tokola okunyatipaleka iikondo yalyo, oopulana dhalyo oshowo okutalulula iilonga yuuministeli niikondo yepangelo opo yi tule po omathanekodhiladhilo ngoka taga vulu okweeta po sha shomupondo, Angula ta yelitha.

Omuprimaminista ota ti shimwe shomoonzo dha simana noonkondo shoka shi na okutulwa miilonga mokugandja omayakulo ga nuka po osho elongithonawa lyethimbo.

“Ekwatonawa lyethimbo oshowo eitulomo enene oyo iinima ya dhenga pombanda megandjo lyomayakulo kaantu,” Omuprimaminista ta ti.

LEAVE A REPLY

Please enter your comment!
Please enter your name here