O Ministeri yOuveruke Maiyandja Ombango

0
7

I Kae Matundu-Tjiparuro

OTJOMUISE

Oministera yOuveruke nOndumbo yOtjiwana yatie kutja mbe kohorora ozonganda zouveruke nga vetjeverwe nomasa nu wina omiti omukohorore ngavikarepo kangamwa oruveze.

Ondiero indji yatoorerwe pombongarero oministera, Richard Kamwi, ndjari nayo kuna ovyunru vyayo vyo kombanda Oritjavari. Ominisetra ya haamisire ombongarero indji kombunda yo ma kwekururiro wo vyungura vyorupa indui mo zongoramambo ngeri omakwekururiro wina katjisupi ku kweri kwambere otjiuru tjehi Hifikepunye Pohamba. Komurungu oukohoke wotuveze ma u tjiverwa no kuutarera popezu oruveze aruhe okupwisa no kuyandja omasa kuwo. Mongondjero indji mape yandjua ekopi konasareta ndja ungura nawa motjitamba ihi.

Pamunikirwe ouhepe wo viyarwa ku viza, komakohero nawina mo ma pwikiro. Munao otji patierwe kutja ozomahina ozongohe zetizirwe mongaro oungure nu wina omatuuwo yo ma pwikiro yepewe etjeveraho etwe. Ombongarero indji yatarere nongendo onene kouhepe mbuhayanda wovitoore ovinahepero tjimuna vyo vavere nawina vyo kuvaze kozombokoto. Nai pena ovimbumba mbimavitara mouhepe imbwi motukondua atuhe nawina morutuu oruparanga ro ku yaruramena mo ovitoore vyarwe mu imbi mbya rira ovivi poo mbya kurama. Ombura indji maperandua ovitoore vyo vavere o 20.

Ohunga no u kurupe wo vyungurisiwa vyo mapangero makuzu nai pena orutuu rondunge yoku yarurapo ovyungurisiwa mbya kurupa na vyarwe ovipe.

Ohunga nozonesa sondondo ondenga poo yo mautiro paraisirwe kutja o ministeri yahingi ozombura aiha yenene okuyandjera ozonesa inda omayuva wo kurihonga kutja zerire ozonesa okuura mena rouhepe wozonesa ozoute morupa indui. Posyo o ministeri ya kaenda omikambo omiwa komurungu mo kutara kouhepe wo zonesa ozoute tjiyaza no kuyera ovihako vyo zonesa ozovatere kozonesa ozoute okuvatera kutja ovahongwa mbazu mozosikore vehakahane okuhupikwa okurira ozonesa ozoute. Wina nai pena ondunge yo ku hongisa ozonesa ozoute ape 200 mombura nozo nesa okuur o 180.

Ndoovazu ya kaenda komurungu okuhongisa ozonesa ozoute okurira ozonesa okuura okutja ka naa pekara oruveze kozonesa ozoute. Munao o ministeri nai otjiiri motjiungura tjo kutara kutja nani maiyenene okuyandja omayuva wo merihongero kotjivaro otjititi kozonesa zondondo yo mautiro mbakara orure movyungura nu ndu mazeyenene okuurisa mbihepwa okuritjangisa ko University ya Namibia ko merihongero wounesa no kupandukisa.

Komatungiro no matunino no ma yeruriro wondengu wotuveze tuo u veruke ombongarero indji ya itaverere kutja otjo tjiri otjiungura ihi tjiri kombunda no mena ro ouhepe wo tjimariva. Otjo tji raisiro ombura indji otja korutuu ro matungiro o ministeri aa ihepa ozondola za Namibia omangete o 20 kozo kirinika no nozondola za Namibia omangete o 13,5 kozondanda zouveruke.

Oyo ya ye nena okupewa ozondola za Namibia omangete muvyu uriri kozokirinika nomangete yane ko zondanda zouveruke. Munao otji yaningirire kutja ipewe otjimariva tji matjingara nuwina kutja iyandjerwe kutja otukondua tukambure omatungiro wozokirinika oku tikonaparisa ongono.

Ombongarero wina yaraisire ongono yorupa romatunino wo vyungurisiwa nai iyandja ondunge yokutja o ministeri ndjikara notjiungura ihi itjiyandje kuyo otjo mazengururiro omakarerere. Pokati kotuveze ya munine ohepero yoku pamisa omaunguriro wakumwe pokati kayo no ministeri indjo yarwe tjinene mo kutjevera omatunino.

LEAVE A REPLY

Please enter your comment!
Please enter your name here