Iikonga yOpamuhanga Okukondjitha Opolio

0
5

OSHAKATI

Namibia pamwe niishiindalongo ye; Angola naDRC otaya tula uukuni kumwe okutameka pambelewa iikonga yokukondjitha omukithi gopolio, naashika otashi ka ningwa mOmaandaha, 26 Juni nuumvo pondoolopa yokoongamba Helao Nafidi. Omukuluntuwiliki gOproholoma yUundjolowele moshitopolwa shaHangwena, Kaino Pohamba okwe shi koleke noshifo shika.

Etameko lyopambelewa lyiikonga yopamuhanga olya zi moonkundathana dhayooloka pokati kiilongo mbika itatu okukonga po omukalo gwa kwata miiti okukeelela omikithi dhoka hadhi taambathanwa nuupu pokati kiishiindalongo mbika. Konima ashike yeegululo pambelewa, iikonga yetuntilo otayi ka tameka okuza momasiku 27-27 Juni kaanona mboka ye li kohi yoomvula ntano.

Aanona otaya ka tuntilwa okukeelelwa komukithi gopolio – guulema nokupewa omata gOvitamine C. Edhingoloko etiyali lyomatuntilo otali ka ningwa ishewe okuza momasiku 25-26 Juli, naPohamba ota ti aanenentu ye thike 1 000 oya hiywa okukala peegululo ndika lyopambelewa.

Osheendo shaanambelewa okuza moNamibia otashi ka kwatelwa komeho kOminista yUundjolowele nIilonga yOnkalonawa, Dr. Richard Kamwi.

Mokati kaanambelewa mboka ya hiywa omwa kwatelwa aanenentu okuza koDRC nokoAngola; Ngoloneya goshitopolwa shaKunene moAngola, Pedro Mutindi; Aakalelipo yEhangano lyUundjolowele mUuyuni (World Health Organization -WHO) oshowo aanambelewa yoUNICEF. Pohamba okwa yelitha wo kutya oshitopolwa shaHangwena osha hogololwa okutameka oshikonga shika omolwomikithi dhoka dha tamekele moshitopolwa shika kuyele nuumvo.

Oshikwawo, oshitopolwa shaHangwena ohashi yakula nokutalelwa po kaantu oyendji okuza miishiindalongo mbika iyali okupitila pomuyelo gokoongamba pOshikango.

LEAVE A REPLY

Please enter your comment!
Please enter your name here