Omufekelwa mOshipotha shAaitendiko Okwa Hala Okufala Epangelo kOmpangu

0
6

WINDHOEK

Omunamimvo 38, Liswaniso Siliye, ngoka e li gumwe gomaafekelwa yaali mboka ya mangululilwe mokakuma iiwike ya zi ko shi nasha noshipotha shaaitendiko yoshitopolwa shaCaprivi, ota ti okwa hala okufutitha Epangelo.

Omwedhi gwa zi ko, ngoka a li nale omunambelewa gwetonatelo lyaanandholongo pEndiki lyEzulonkalo poDivundu, Siliye oshowo Vincent Khasu Simai goomvula 47 okwa li ya mangululwa kOmpangu yOpombanda. Sinai ngoka a mangululwa pamwe naSiliye omasiku ga zi ko ina vula okukala poshigongi shiikundaneki shoka sha ningilwa poLiberty House mOvenduka.

Pethimbo lyiihokolola mompangu, aatamaneki oye shi zimine kutya ka pwa li omauyelele gi ihwapo okutula aalumentu mbaka mokakuma shi nasha niipotha tayi tamanekelwa mboka ya kutha ombinga moonkambadhala dhokutenda ko Caprivi kuNamibia, omakuyungutitho goshigwana, okukala niilwitho shaa li paveta noondjembo oonene nelalakano okukutha ko koonkondo oshitopolwa shaCaprivi. Poshigongi shoka sha ningilwe metitatu nosha longekidhwa kEhangano lyUuthemba wOmuntu lyOpashigwana (National Society for Human Rights -NSHR), ngoka a li nale omunambelewa gondholongo, ota ti okwa hala okufutitha epangelo molwaashoka a kwatwa nokweedhililwa papuko nokaa shi li pauyuuki, oshowo okunyateka edhina lye.

Omaukwatya galwe Siliye a hala okufutilwa kepangelo ogi ikwatelela aniwa komikalo dhokupulwa okanaku yo naSinai, oshowo kutya inaya pewa omauyelele shi nasha nomauthemba gawo ngaashi ge li mOkatendo 17, ano uuthemba okukala ino yamukula komapulo nokupopya sha shoka tashi vulu oku ku tamanekitha, oshowo okukalelwa po paveta komunaveta gwepangelo nenge ngoka ye mwene a hala.

“Ondi uvite kutya epangelo lyaNamibia oli na oku tu futile molwokweedhililwa shaa li paveta nedhina lyandje olya nyatekwa. Okwa li nda yugwa uuthemba okukalelwa po paveta,” Siliye ta ti.

Kepulo ngele okwa li a dhengwa konima sho a kwatelwa moBotswana nokushunithwa koNamibia, Siliye okwa lombwele aatoolinkundana ta ti:

“Paungame mwene, inandi dhengwa nando kolutu kaapulapuli yandje,” kakele ota ti ye okwa “kwatwa po ombambyona” moBotswana pamwe nayakwawo nokweetwa moNamibia shaa shi pahalo lyawo yene. Siliye oku na eiyuvo enene kutya oshitopolwa shaCaprivi kashishi nando oshitopolwa shaNamibia, nota ti oshipotha shokutenda ko Caprivi otashi vulu ashike okukandulwa po papolotika nopambili ngele epangelo olya kundathana nomuliwiki gwaaitendiko, Mishake Muyongo ngoka e li ngashingeyi muupongekwa.

Omukuluntuwiliki goNSHR, Phil ya Nangolo, nonando e uvitile ohenda oshinima shaaitendiko, okwe shi popi poshigongi mpoka kutya,” omakuyunguto inaga taambiwa ko nando nando.”

“Ngame Omucaprivi gwolela nda za moshivalelo shameme. Caprivi kashishi nando oshitopolwa shaNamibia pandjokonona oshowo paukaalita koshilongo,” Siliye ta ti ngoka i itala ko ye mwene, “omunandholongo gopapolotika” ngoka a kwatwa po shi nasha nomaitaalo ge gopapolotika.

Oku uvite kutya yakwawo mboka ye li natango mokakuma okwa li wo ye na okumangululwa kOmpangu yOpombanda esiku ndyoka ye a mangululwa.

“Atuhe okwa li tu na okumangululwa esiku ndyoka nda mangululwa,” osho a ti mekwatathano nayakwawo mboka inaya mangululwa. Ya Nangolo okwa yambidhidha wo omapopyo gaSiliye ta ti, “kape na omuntu e na okuyugwa uuthemba we wemanguluko, kakele ngele shika otashi ningwa palandulathano nopaveta, ishewe kape na omuntu ta thiminikwa okugandja uumbangi mboka tashi vulika wu mu tule moshiponga.” Ya Nangolo okwa pandula emangululo lyaalumentu mbaka yaali, ta ti ka kwa li a kumwa ko ketokolo ndika, molwaashoka ye mwene okwe shi tala ko “omikalo dhaa li paveta nelandulathano” dhoka dha etitha Siliye naSinai ya etwe komeho gwompangu. Omanga ina mangululwa momwedhi Mai, Siliye nayakwawo 11 moshipotha oshitiyali shaaitendiko, okwa li a nyolela epangelo ombapila tayi pula ya futilwe oshowo oku ya galulila omauthemba gawo shi nasha nokukwatwa papuko nokweedhililwa shaa li paveta oshowo shoka taya ti omatamaneko kaa ge li mondjila. Siliye naSinai okwa li ya kwatwa po nokweedhililwa moBotswana momasiku 19 Septemba 1999 oshowo eti 6 Desemba 2001. Omanga inaya kwatwa po, oya li mongundu yaantu 3 000 mboka ya yile ontuku okuza moCaprivi mboka kwa li taya ti otaya ningilwa omambandameko nomatilitho gopapolotika, omapopyo ngoka ga ekelwahi kokule kepangelo.

LEAVE A REPLY

Please enter your comment!
Please enter your name here