NBC Zinalituramo Mokutura Uuyungiro Womuntu Momuwa

0
8

MOVENDUKA-NBC nelikwamo lyazo eli lyakarapo ngwendi mudukuli, pontambo zokuzeruka eli ava tumbura asi Chat show no open line moruwambo kulitumbura asi Ewi lyamanguluka ano moruherero kulitumbura asi Tjirimeyo omu lina kara ngesi kuna kureta magano gokulisiga-siga.Vamwe vana pura ndi asi kuna kuliza nombongarero zanavenye omu vana kulimona elikwamo eli asi kuna kuliruganesa mepuko omu vana kutukagura vakwawo mompepo.Ano vamwe kuna kutjira asi nepu nalitundako elikwamo eli kuvhura vapire kugwana uuyungiro wawo. Owo vana kugazara asi elikwamo ewa kuna kutanta asi mulyo unene omu ava lilimburura vantu pampepo,awo hena kuna kumona asi udemokoli kuna kugendapo nawa.Mulyo gwalyo kuna kara asi kupulisira vantu womonkarapamwe vagave magano gawo,yimwe kukara asi kapi ayikara asi vantu vapurakene ano yimwe morwa kuvatera vantu ava vakara asi ponze zonodoropa ano kumoneka asi mavango gamwe vana mbudi vetu kapi ava kasikako nye vantu awo tava yireta mompepo.Momazuva 25gaKudumogona mvhura zeezi ministera gomapukururo nonombudi Netumbo Nandi Ndaitwah katanterere muhoko asi mbunga zegendeso zaNBC kazitokwere kutjindja ngendeseso zelikwamo eli lyamudukuli yipo asi vahepa kuturapo situmburwa esi navauyunga vantu kapisi nkenye ogu auyunge eyi ana hara.Ndaitwah katente asi sitambo kuna kara asi kapi navakatarerera hena vantu vatukagure vakwawo koradio.Nye age kapi katente asi siruwoke ngaliza moyirugana erundururo eli.Mugendesi kurona gwaNBC,Vezera Bob Kndetu kayinkondopekere asi yousili vana hara kuretamo elitjindjo.Nye age kapatanene asi awo kapisi kuna tjindjire eyi morwa kuna kugwana upyu kovanapolitika. Kandetu katente asi apa gagusire ugendesi ou konyima tupu zomakwedi murongo gana pitipo udigu ou wokupira kulifumadeka awo nare watameka.Awo vantu nare vatameka kuhomokera presidente gokuhova mosirongo esi dokotora Sam Nujoma,nomu ngavalihomokere vambanderu vene navene.Dogoro vamwe yipo vatameka kuhomokera NBC,asi kuna kupulisira vantu varugane mapuko mokuza mompempo vaswaure nompitisili dopaupolitika nedi dopampo.Ame nazire mompepo nokutanta asi elikwamo eli lize komeho nefumadeko yipo nkenye gumwe alizuvhe asi nage muntu.Kutunda nye opo hawe magano yiyo nye gana kulisiga-siga dogoro ngesi.Umbondo una karapo kuna kara asi vamwe kwatokora asi radio zikare evango eli navaruganesa vahomokere vakwaawo mokuruganesa nonkango donondona dogoro domatuka.Eyi kwahoroka koNBC komalikwamo gokulisiga-siga kapisi ko Open line kwelike.Eyi tuna yadimbururamo ngesi kuna kara asi vantu kuna kureta nonkango dawo domalinyengo pompepo eyi tuna kumona asi kapi tatuvhuru hena kuyitarerera ntudi twahepa kuretapo elitjindjo yipo vantu vahagwana mpito zokuswaura vakwaawo.Kandetu katente asi morwa nokonda nye odo awo yiyo kavatokwere asi elikwamo eli tanko lihage.Apa ngalitameka vahepa kuwizapo nosiuyungwa yipo asi vantu ngava uyunga kukwama siuyungwa oso sina karapo.Ose ngatutwikira kutara asi ngendeseso ziwape siruwo tupu yiso ngasitupa nye asi yinke yina kukwamako.yimo ana kutanta Kandetu. Age kapi kaligwire nava vana kutanta asi ngendeseso zompe ngavaziruganesa moudemokoli nouyungiro womuntu.Udemokoli pwawene kapisi nawa.Udemokoli kapi wakara tupu asi uyungiro welike,nye kwakara asi kuvhura kuruganesa mokulipa magano.Ano mongendeseso zoozo zokulipa magano yimo amu kawiza dogoro vamwe tava ruganese nonkango donondona.Nampili ngomu yina kumoneka asi yousili vana tambura umbondo ou vamwe vaza ure dogoro vapitakana uyungiro wawo.Ose twahepa kudiva asi ngapi tuna kukeverera eruganeso maraka gomadona.Vantu hena twahepa kuvatantera asi ngapi navakara nomu navauyunga.Ngesi vantu navenye vayifire nye morwa vantu wononkedi dangesi.Kandetu elimbururo lyendi kalikere tali piyaganeke apa kamupuragerere New Era.Age katente asi vamwe varugani wokoNBC kuvavhura kugendesa elikwamo eli momuwa.Nominute dokukwamako age katente asi vantu ava ava wiza pompepo awo kuuyunga nawo ntani moomo ana kuuyunga ngoso nare ana tjitji eraka ndi asi siuyungwa,nare ana vhongomo nonkango dono ndona udigu unene kuyirugana eyi.Ose kuruganesa tupu mokuninka asi turuganese nominute nye kwato odive asi yinke ana kuuyunga muntu ogo.Age hena yiyo katente asi NBC kapi tazipumbu asi ngano muntu ogo yinke ana hara kuuyunga ose kutara tupu asi muntu gahamana siruwo.Age kamonekere asi ana hafere ngendeseso ezi zina kara asi ngano vaturepo elikwamo asi yinke vana kuuyunga kapisi nkenye gumwe auyunge tupu eyi ana hara. Age ana parapo asi ngendeseso ezi vana zitambura nare kombongarero zanavenye moomu tupu kayinkondopekere ministera Netumbo.Apa kavayiuyungire mombongarero zanavenye vamwe kavatente asi eyi kuvhura yihoroke ngwendi yeyi yina kuhoroka moyirongo yimwe ngwendi Rwanda.Nage yiyo kagwedereko asi hawe ose kapi tuna hara yihoroke ngwendi yeyi yahorokere moRwanda,vantu validipage morwa mauyungo gokoradio.Yosili kuvhura yikare asi vana politika kuvhura varete malitjindjo ndi hawe.Moomu yahorokere moZambia vantu vamo ngava tumbura presidente gwawo madina gomanzi nomvhura nadinye edi ana kara presidente. Matukaguro aga ngava tuku presidente ogo kwareta dogoro vantu vamo validipage.Presidente Levy Mwanawasa kwakere moudigu.Vantu kuna kumona udemokoli ngwendi asi nkenye tupu eyi ono uyunga ndi nkenye omu tupu ono rugana mukweni kuna kumoneka ngwendi simwe soyirugana yoge.Awo kuna hara kutanta asi nepu kapi ono hara upyu tundamo mokombisa. VaNamibia ava vana kara asi kuna hara kugwana mboroto kuna kugazara asi nsene varugana oyo nampo hansa.Nye upolitika wetu kapi una kugwana uturo,morwa vantu kuna kulitukagura tupu pampepo.Mokugwananye uyungiro ou vantu ngesi vadive asi tayikalitjindja,ose tukapurakene tupu kosiuyungwa simwe mezuva.Ngendeseso ezi kuvhura zikakare ngwendi zelikwamo eli vana kutumbura asi Talk of the Nation. NBC kuna kuhundira asi vantu ava vana kara noyiuyungwa vahepa kuwiza melikwamo ngwendi Talk of the Nation.Omo yimo atumono asi vantu ava ava wiza pompepo kudimba rusumo rumwe tupu,kwato asi nkenye ogu rwendi.