Aaniihauto Ya Futithwa N$500 000 Pashikando pOomboloka dhOmoondjila Pethimbo lyOpaasa

0
11

WINDHOEK

Ekatukonkatu lya yaga komuntu okukaleka po egameno lyomoopate ndyoka lya ningwa kaanambelewa yomoondjila pashikonga Xupifa Eemwenyo pethimbo lyefudho lyOpaasa, olya etitha aaniihauto ya futithwe okapandi konyala N$500 000 pashikando – ano aantu ya pulwa ya fute pethimbo ndyoka.

Pethimbo ndyoka, aaniihauto 263 oya futithwa konyala oshimaliwa N$80 000 sho ya hingi inayi imangela mo, omanga aantu 44 ya kwatwa sho ya hingi ye li kohi yondungo. Iiningwanima yilwe yi li 222 oya lopotwa shi nasha nokuhinga ondapo ya pitilila, omanga aantu 123 kwa li taya hingi kaye na omikanda dhokopate – ano oolisinisa, yakwawo ye li 78 oya dhitikwa sho inayi iyutha komandhindhiliko gomoondjila.

Omuyalu konyala goshimaliwa sheetata lyomiliyuna yimwe osha futithwa okuza kaaniihauto ayehe mboka ya holokele komeho gompangu moshilongo ashihe konima sho ya ndopa okwiiyutha kooveta nomalandulathano gomoondjila.

Poshigongi shiikundaneki metitatu, Ominista yIiyenditho nOmakwatathano, Joel Kaapanda okwa tseyitha kutya aantu 1 263 oya pewa uutekete womageelo gomoopate shoka sha etitha oshimaliwa shongushu yokapandi N$289 000, omanga aaniihauto ye li 680 ya pangulwa paempangu dha longekidhwa owina okuungaunga niipotha mbika mpoka oshimaliwa N$198 500 sha futwa. Mokati kiipotha ayihe ya ungaungwa nayo, iikoya 24 oya undulilwa komasiku gokomeho, omanga aantu yatatu ya tulwa mondholongo sho ya ndopa okufuta omageelo gawo poshikando – ano mpoka ya kwatelwa.

“Tse otwa ulukila oshigwana kutya otu na oshinakugwanithwa shoonkambadhala dhokukonga oonzo noku dhi longitha pamukalo gwontumba nelalakano okusindana,” Minista ta ti.

Oprojeka yomalolelo ndjoka kwa li ya kamba ko iitopolwa ngaashi Hardap, Oshana, Erongo, Khomas, Otjozondjupa, Ohangwena, Omusati nOshikoto, otayi hokololwa kutya esindano enene oshoka oya etitha egwopevi lyoopelesenda 44.4 dhomiyalu dhiiponga yomoondjila moshilongo ashihe.

Iikonga pethimbo lyOpaasa oya ndhindhilike iiponga yomoopate yi li 94 pakuyeleka niiponga 169 pethimbo lya faathana omvula ya zi ko. Iiponga oya shunithwa pevi noopelesenda 86 (iiponga iheyali ya lopotwa) pakuyeleka nethimbo lya faathana omvula ya za ko sho iiponga 30 kwa li ya lopotwa.

Oshikonga shoka natango osha lopota egwopevi lyiiponga iishona noopelesenda 52. Kakele iiponga mbyoka yi nyanyaleka oya ya pombanda noopelesenda 29 pakuyeleka nomvula ya ya. Moopate dhoka kwa li dha shonekwa, iiponga ashike itatu ya holoka mo.

Kaapanda ota ti Epangelo olya koneka ompumbwe okunyatipaleka ekalekopo lyoveta nelandulathano, unene pomathimbo giituthi iinene, omahuliloshiwike oshowo pootundi dhokuzimbuka nokuya kiilonga mpoka hapu holoka unene omaso niiponga.

Minista ota ti aanambelewa yokukaleka po oveta nelandulathano oye na okulongitha omukalo gokwaaneidhidhimikilo lyaantu mboka haya hingi ya kolwa oshowo mboka haya hingi kaye na oolisinisa nomikanda dhilwe.

Omayono ngoka itage ki idhidhimikilwa oga kwatela mo okupita momalombota omatiligane, okwaasimaneka omandhindhiliko gomoondjila, okusineya shaa li paveta oshowo pomahala hala mpoka inapu pitikwa okusineya, okuhinga uukodhi tau ka lala, uuhasha mokuhinga nomaihumbato guupwidhi koondalayiva. Pauyelele waKaapanda, eyono kehe lyooveta dhomoopate otali ka kokololela aahingi ondjandjo nomahundju – ano otali etele aahingi omaupyakadhi, onkee oondalayiva nadhi kale tadhi ‘ihumbata nawa.’ Minista ta gunu oondalayiva dhi kale nombepo ombwanawa yokuhinga uuna taya hingi moopate: “Ngele oto hingi ohauto yomondela onkulu, ou na okukoneka kutya dhika oopate dhopashigwana, hadhi endwa komuntu kehe.

Ngele owa hala okukala megameno, vulika kooveta nomalandulathano gomoondjila.”

Minista ota pandula aanambelewa ayehe yokukaleka po oveta nelandulathano omolwesindano enene lyoshikonga shika. Omupehaminista gwEgameno nEpopilo lyOshigwana, Gabes Shihepo poshigongi shoka ota ti iikonga mbika otayi ka kala omuthigululwakalo pethimbo lyefudho kehe lyopashigwana.

LEAVE A REPLY

Please enter your comment!
Please enter your name here