Ozonesa Mazepanda Okuungura Ohoromende Tjiihina Okuzuva

0
11

I Surihe Gaomas OTJOMUISE Ozonesa mazetja ndoovazu ohoromende kayi itaverere keningira razo okupwisa ongaro yazo movyungura no ku ye rurura ondjambi yazo yo vyungura vyo kombunda yozoiri, mazepanda okuyenda kovyungura. Oritjatatu oiri yo mariro ozonesa ndehina ohange omasere za wo ronganene pomahitiro wo nasareta yohoromende yo mondivitivi puza karere no mbongarero yo zombuze oku hungirira kovipe mondjakaha pokati ko horomende nehika rozonesa indi o Namibia Nurses Union, poo o Nanu. O Nanu yapa ohoromende oruveze nganduu Oritjavari tjiyeri 23 komweze imbwi okwiitavera keningira yaro nu tjii hatjitire nao ozonesa kazena omwano warwe pendje no ku panda kovyungura. Otja ku Abner Shopati, omunane wo Nanu, kapena kuheya kutja tjiyeri 23 komweze imbwi eeyuva romapandero wo kovyungura nungwari ee yuva oruuano indui ndu maru ripura kutja maru panda okuyenda kovyungura poo inde nu ndoovazu marupanda orune. Shapota watjere omaheya ngapitire mo zombuze ngumayetja omayuva ingo mapekara omapapandero wo kovyungura mo u paranga wehi arihe kayena owatjiri. “O tjo mutjangerepo omunene hina ondjiviro yo mikambo imbyo nu tjingetjo ounane auhe who Nanu ka u nayo. Tji matu tjiwa ohunga na tjiyeri 23 ku Rozondu okoo kutja eyuva eseinina ohorormende okutupa eziriro rayo ro kotjiveta komaningira wetu,” Shopati wa kahurire na raisa kutja mahungirire korutuu romutjemo ombura djazuko mu Tjitarazu ndu vayandja kohoromende. Watjere ndoovazu pakara omapandero wo ko vyungura tjiyeri 23 ku Rozondu okutja ka kehi yo Nanu nu ounepo wayo ka u na oku kara norupa muwo.”Katuna oku yaruka ombunda tjazumba wina katuna okuvanga okutiera po ohoromende posyo matu kayenda komurungu notjirwa tjetu nganduu ovahona vetu tji va vara omitjemo vyetu,” watjere. Omutjangerepo Omukarere wo Ministeri yOuveruke Nondunino yOtjiwana, Onganga Kalumbi Shangula, watjere ovo kavena kunyinganyinga no tjina ihi ovanarupa mutjo avehe mave tjipe ombango nganduu ko Ministera Ondenga. Oritjavari o Ministera yOuveruka Nondunino yOtjiwana, Richard Kamwi, warakizire ozonesa mehi arihe outue kutja tjiveritua mo mapandero kangamwa yo ko vyungura omweze imbwi ngave tjiwe kutja mave munu tji tja muna Nganya kovi hwarakata. “Kapena omundu omunene po veta. Mokuhaka kwandje imba mbehina okupuratena mave tjimunuko. Ngavetjiue kutja eyuva indo auhe ma hungamwa kuye omwini kamo tjiwangungu, ” Kamwi watjere tjari mouyenda we ko Puwo okuhungira kotjina ihi kuna ozonesa. Shopati watjere ondjakaha yo vyungura indji ya ririre opoloptika tjiyari 13 ku Tjitarazu ombura ndjazuko o Ministera yOkehi yOvitjitua vyOvyungura, Petrus Ilonga, tjatjere Shapota “kavanga o Swapo” nu wasere okurambwa. Shopati wayanisire okutirahi nandarire ombindu ye oku urisa ongamburiro ye na kuminine o ministeri mokutanda, oku kuna omburuma no ku ninikiza oumune we ngeri omatombero wo Ngundeveta.