Aapangi Ya Gandja Esiku Lyahugunina

0
8

WINDHOEK/OSHAKATI Aapangi 300 lwaampoka mboka ya ningile ehololomadhiladhilo lyopambili mOvenduka metitatu oya pe Uuministeli wUundjolowele nIilonga yOnkalonawa omasiku 30 opo wu yamukule komaindilo gawo, ngele hasho otau ka taalela eiteekomiilonga enene moshilongo ashihe. Aapangi otaya pula uuministeli wu tule po esiku moka ye na okukundathana omanyanyeto gawo nehangano lyawo Namibian Nurses Union of Namibia (Nanu). Aapangi 300 lwaampoka, aaniilonga yomosaala naawopaleki okuza moshipangelo shaShakati oya gandja omukanda gomaindilo kOmukuntuwiliki gUundjolowele moshitopolwa, Dr. Naftali Hamata. Omuunganeki goNanu moshitopolwa shaShana, Eva Velikoshi, okwa ulike euvombili lye kehololomadhiladhilo ndyoka oshoka aavu miipangelo inaya gumwa kehololomadhiladhilo ndika lyopambili sigo tali hulu. Iinima mbyoka yi li momukanda gwenyenyeto oya kwatela mo iifuta yolutayima momasiku gomafudho noosoondaha, omutungilo omupe goondjambi, ehogololo li na okuningwa pokati kaNanu naNapwu ku talike kutya ehangano lini tali kala nuuthemba wokuungaunga nomaupyakadhi gaapangi negameno lyawo. Ehololomadhiladhilo mOvenduka olya tameke 12H00 naapangi oya tameke okugongala komeho goWindhoek Central Hospital omanga inaya nyanyata ya thinda koombelewa oonene dhuuministeli mbuka. Yamwe yomaapangi okwa li taya longo uusiku, noya ngungula ya yedha omapulakata kwa nyolwa omatumwalaka gayooloka. Gamwe oga nyolwa “Shangula omolwashike wa tinda okupopya natse?” Aahololimadhiladhilo okwa li tayi igidha taya ti: “Napwu owe tu kengelela!” MOshakati, omatumwalaka komapulakata otaga ti “Tse otatu pula oondjambi dhetu dhi li nawa dha gwanena iilonga mbyoka hagu longo.” “Otwa hala olutayima ihalu lunduluka” “Aapangi oye li iilyo yoNanu ndele kaye shi yoNapwu.” “Kamwi naShangula hulithiipo oku tu ningila omatililtho” “Tse otu na uuthemba ashike ngaashi ne.” Aapangi mboka ya ningi ehololomadhiladhilo lyawo pethimbo lyomwiha oya nyanya okuza pEndiki lyOositola dhoYetu yuuka kombelewa yomukuluntuwiliki guukalinawa. Dr. Hamata okwa yakula omukanda gomanyenyeto nokwa li e ende pamwe naMatrona Lelly Nunes. Aapangi poshipangelo shaKatoolika St. Martin pOtshikuku nayo oya ningile ehololomadhiladhilo nokugandja omukanda gwawo kombelewa yaKansela gopashitopolwa. AmushangaNdjayi goNanu, Abner Shopati ngoka a kwa kwatele komeho aahololimadhiladhilo moshilandopangelo okwa lesha omukanda gwawo manga ine gu gandja kaanambelewa aakuluntu yuundjolowele mboka ye gu taamba ko peha lyaMinista. Shopati ota ti aapangi oyo esipa lyombunda lyuukalinawa moshilongo, ihe ngele tashi ya komauwanawa gomiilonga, ihaya mono omboloto ya gwana. “Tse otwa tongolwa kuuministeli wetu pakuyeleka naaniilonga yakwetu yalwe, ngaashi oondohotola naaniilonga yomooaputeka.” Shopati ota ti oondohotola dhopaunamiti naaniilonga yomooaputeka oye na omalutayima gawo ihaga lunduluka ngoka haga tulwa aluhe koondjambi dhawo, noondohotola ohaya futwa ishewe omalutayi gokulonga miikondo yokuthikila aavu (casualties) olutayima ndoka halu tulwa ishewe kombanda yofuto yolutayima ndoka lu li po nale. Ta ti uuministeli owu na okukoneka nawa kutya Nanu oye a kalela po aapangi oyendji, nangele uuministeli otau yelekanitha Nanu noNapwu, nena ndoka oluhindo lwa yaga kegonga. Shopati ota ti konima yomalunduluko ga ningwa koWascom, uuministeli owa nawapaleka ashike oondjambi nomauwanawa goondohotola, aaniilonga yopankalathano, yomooaputeka oshowo yoproholama yuukalinawa. Velikoshi ota ti shika oshikando shotango aapangi ya longitha ompito ndjika okuholola omadhiladhilo nomaiyuvo gawo nemanguluko. Okwa li ya tegelela aapangni oyendji ya kuthe ombinga, ihe yamwe oya ningilwa omatilitho onkee inaya ka thika we. Sho a pulwa shi nasha noshilanduli kaagandji yawo yiilonga, Velikoshi ota ti aapangi oye li moshilongo shuudemokoli noye na uuthemba okuholola omaiyuvo gawo pambili nopalandulathano. Oshikwawo aapangi inaya taaguluka nando oveta oshoka oya ninga ehololomadhiladhilo lyawo pethimbo lyomwiha nayamwe oya li mefudho. Pokati mpoka, Amushanga Omukuluntu mUuministeli wUukalinawa, Dr. Kalumbi Shangula ota ti aavu oya kala taya tonatelwa nokumona omayakulo gawo goshito, oshoka mboka ya ningi ehololomadhiladhilo oyo mboka kaa ya li miilonga pethimbo ndyoka.

SHARE
Previous articleRutandu Kuna Kutjilisa
Next articleHaingura the Winner