Muni gwaVenduka A Lombwelwa A hulithe Po Efutitho Lyapitilila

0
12

WINDHOEK Ominista yOomina nIikwankondo, Erkki Nghimtina okwa gandja elombwelo kOshilando shaVenduka shi hulithe po efutitho lyapitilila kookasitoma dhe nokwiiyutha komilandu dhiifuta yomalusheno dhoka dha ziminwa kolutu lwekondololo lyomalusheno (Electricity Control Board – ECB). Shika osha ningwa konima sho oECB ya yakula omanyenyeto okuza koongundu naantu taya ti Muni ota futitha iimaliwa oyindji unene okuza kookasitoma dhe pakulongitha omukalo gwefutitho ngoka inagu ziminwa. Omolwoshinima shika, oshigongi shomeendelelo osha ningilwe kUuministeli wIikwankondo nOomina okukonga ekandulopo lyomukundu pokati kaMuni gwaVenduka nolutu lwekondololo lyomalusheno – ECB shi nasha nomanyenyeto ngoka. Iiyetwapothaneko mbyoka ya zi moshigongi shoka sha gongalwa kUuministeli wIikwankondo nOomina, Muni gwaVenduka noECB naHahendeNdjayi, ministesa okwa gandja omukanda ngoka tagu lombwele Oshilando shaVenduka shi tameke okulongitha omukalo gwefutitho goosenda 0.45 moyuniti yimwe ndele kashishi oosenda 0.5 moyuniti yolusheno. “Egwedhelo lyiifuta yoECB okuza (pooyuniti 0.45c okuya pooyuniti 0.5) kali na okufutithwa ngaaka na ishewe oli na okuwapalekwa,” minista ta ti. Ominista natango oya gandja elombwelo kutya iifuta yoECB mbyoka hayi eta po oshimaliwa shontumba oshowo iihohela kuMuni oyi na okutulwa moshiketha, notayi ka vula okulongithwa monakuyiwa koECB moka tamu ka za wo omauwanawa gookasitoma dhaMuni gwaVenduka. Nghimtina okwa holola wo euvombili lye shi nasha noshizemo shoonkundathana pokati koongundu dhika mbali. Ta gwedha po kutya iigongi yilwe otayi ka ningwa pokati koECB naMuni okutala kiikundathanwa ya guma oshimaliwa opo ku lundululwe iifuta yopethimbo ndika mbyoka inayi ziminwa paveta “opo ku opalekwe eyonagulo ndyoka lya ningwa po” Omitumba dhoka otadhi ka kala wo ompito ombwanawa okukundathana omapuko ngoka ge li po. Minista okwa gandja wo omayele kuMuni gwaVenduka a popye nelelo lye shi nasha netalululo lyomukalo gwiifuta mbyoka ya ziminwa pambelewa. Kakele koosenda 0.5c dhoka inadhi ziminwa dhoka tadhi longithwa kOshilando shaVenduka, egwedhelo lyiifuta noopelesenda 10.2% ndyoka lya ziminwa koECB sha zi meindilo lyaMuni inali tulwa miilonga. Ihe peha lyaashoka, elelo olya zimine ashike iifuta yoopelesenda 14.7, oopelesenda dhoka dhi li egwedhelo lyiifuta noopelesenda 11.9%. Oshilando shaVenduka oshi ipatana okanaku kutya otali futitha ookasitoma dhawo iimaliwa ya pitilila. Peha lyokutula miilonga iifuta yoopelesenda 10.2% dhoka dha ziminwa koECB, Muni okwa gwedhela iifuta ye noopelesenda 8, moka ta mono mo oshimaliwa okulongitha ondhalate koshikondo shayo shomalusheno. Kakele pauyelele woECB, oshimaliwa shoka kwa li e na okumona miigwedhela mbyoka okwa li sha nuninwa etopolo lyomalusheno koRED, ndyoka lya tindwa koECB, oshoka aalongithi yolusheno hayo ye na okuza oshimaliwa shoka shi na okulongithwa moprojeka ndjoka. Omunambelewa omukuluntu goECB, Siseho Simasiku, okwa limbililwa kutya omolwashike Muni gwaVenduka a hala aakalimo ye oyo ya ze iimaliwa yetotepo lyoREDS, omanga oomuni yakwawo, mboka ye li aathigona kuMuni gwaVenduka ya konga omikalo dhilwe okugongela oshimaliwa shoprojeka yoludhi nduka. ECB oya totelwe po momumvo 2000 okuwilika nokukondolola, edhigo, egandjo nokweeta moshilongo olusheno nokutuma olusheno pondje.. Oshilando shaVenduka osha nukile pomutenya momushangwa gwasho kutya inashi futitha aakwashigwana iimaliwa ya pitilila. Muni ta ti paveta ompe oECB hayo yi na oshinakugwanithwa shekondololo lyomalusheno momalelo goondoolopa oku shi talela miifuta mbika. Nghimtina okwa yelitha kutya elalakano lyOntotwaveta ompe yOmalusheno okukondolola oshikondo ashihe shegandjo lyomalusheno, ishewe kape na etompelo lyontumba andola omalelo gopaendoolopa ga kale inaga kwatelwa mo uuna Oveta ndjika tayi tulwa miilonga. Oveta yOmalusheno ndjoka yi li po inayi yelitha mo nawa iinima kondandalunde, kakele Ontotwaveta omepe yOmalusheno yomumvo 2006 ndjoka tayi ka kundathanwa mbala mOmutumba gwOpashigwana otayi ka ungaunga nawa nevundakano ndyoka li li po pethimbo ndika.