Moshitopolwa Omusati Omu na Ookashuli?

0
13

WINDHOEK Opolisi moshitopolwa Omusati otayi ningi omakonakono sha landula komahokololo taga tilitha kutya moshitopolwa muka omu na aniwa aadhipagi taya limbililike – aakashuli mboka tayi inyenge aniwa mOmbalantu nOngandjera. Omupopiliko gOpolisi, Shisande Linekela Shikongo okwe shi koleke koshifo shika kutya opolisi oya mona omanyenyeto ngoka natango taga konakonwa. Omapopyo oga kala moshitopolwa shika sigo ehulilo lyaSeptemba kutya ope na aantu taya limbililike mboka aniwa ye niwe koombepo dhuulodhi notaya tete aantu/iihakanwa yawo iilyo yopaumwene ano taya tete aantu uulumentu nenge uukiintu. Yamwe yomoonakunyenyeta okwa li ya popi moproholama yomayele koshigwana moradio NBC omathimbo ga zi ko, nopolisi okwa tayi pewa uusama sho aniwa itayi gamene oshigwana kaakongi yuupule mbaka. Pauyelele waShikongo, omakonakono gwopetameko oga ningwa ihe sigo oompaka inapu monika omauyelele gothaathaa. Ota ti ita vulu okudhina kutya shika itashi vulu okuningwa, oshoka omanyenyeto oga ningwa ngoka ga pumbwa ashike okukolekwa. Shikongo oti indile omuntu kehe e na omauyelele gi ihwapo opo a lopote iiningwanima yoludhi nduka kopolisi. Omukundu omunene gu nasha nomapopyo goludhi nduka ogwo nguka kutya ihaga vulu okukolekwa nuupu oshoka yamwe yomaakwashigwana mboka haye ga lopota kaye shi mboka ya tsakanekwa lela kuupyakadhi mbuka, onkee omauyelele gawo aluhe inagi ihwapo opo opolisi yi vule okukatuka oonkatu. “Otwa hala okuungaunga nomukundu nguka ngele opo gu li shili, oshoka ogwa nika oshiponga koshigwana okulumba muumbanda kutya egameno lyawo oli li muupyakadhi,” Shikongo ta ti. Iiningwanima mbyoka otaku hokololwa kutya oyi li momikunda ngaashi Okahao, Oluteyi, Otamanzi nOmbwata mOngandjera oshowo momukunda Omhakoya mOmbalantu.