NBC, Simpe Moudigu Woyimaliwa Zina Kara

0
7

Mbunga ezi zakara asi zepangero udigu wazo wokupira yimaliwa simpe kuna kutwima,eyi kava yimwene apa kavageve yitundwamo yawo yoyimaliwa vahana kugava nombapira edi dina kulikida asi yinke yahoroka,eyi katuyigwene paapa mutaruruli nombapira depangero doyimaliwa kageveko nkumbu. Moyitundwamo yawo eyi kava tarwirwire yomvhura kutunda mo31 Nsinano 2005,eyi kava geve komeho zombongarero zanavenye momandaha gana pu,mutaruruli ntoni katente asi NBC ,Kapi vana gava uzera nampili nakauke asi yinke yahoroka koungawo ou vaweka varandesa.Yitundwamo eyi kayigeve ministera gona goyimaliwa Tjekero Tweya.Mokukwamanya yitundwamo yomutaruruli ntoni uzera kapi kava ugwene komahauto aga varandesa Toyota Hilux 4×4 varandesa koyimaliwa yina siki ko N$93144 ntani Golf Chico N$33 300 eyi yina kumoneka asi kwagarandesa NBC mwene. Simpe NBC kwazumbanesa yimaliwa yina siki koN$74 117 eyi varuganesere varandere varugani vawo nofunguna dopo mbunda ano apa vahageka vantu owo yirugana yiyo vaza nonovhunguna odo.Mokukwamanye yitundwamo yawo ava vana kara megendeso ngesi lyaNBC awo nayimwesi nava vhura kurugana ntudi kudongonona tupu asi valitundirapo.Ntani mambo gakara moVenduka ntani moKatima kwagarandesa,nye kwato eyi yina kulikida asi ngapi omu vagarandesa mberewa zomutaruruli ntoni zaroroka kupura asi ngano vamupe uzera hawe teete. Mokufutisa nye nombapira doTV,mo2005,awo kwagugunyikire asi kuvhura vagwanemo nomiliyuna dina siki ko N$18 nokoN$20 ngoso ano eyi yayamoneka hawe nomiliyuna N$7 tupu dayamonekako.Mokukwama ava vana kugendesa NBC kwato gumwe gwaNBCgakere tatara asi ngapi vana kufutisa vene ava vaPenduka ndi asi vavapureko asi vantu tava futu ndi hawe.Ano ngesi awo vaturapo varugani vamwe vatare asi vantu vafute ntani nokukwamakwama ava vana kupira kufuta.Yitundwamo kuna kutanta asi Penduka nsene takwama owo vana kupira kufuta nsonso ozo zahepa kuza koNBC,kapisi kwaPenduka.Nye dogoro ngesi kwato oku yina kulikida asi yangoso yahoroka.