Muporosi Tava Mukwata

0
10

Gumwe govaporosi kava mukwete nkera paapa kapere gumwe gekoro lyendi asi ngano aka mutjangerepo makonakono gontambo zomurongo nambali yipo asi ngano awapukurure elirongo lyendi.Simpagwa sangesi kasihorokere konyima tupu apa sayitunga zaNew Era kazi puragerere mukurona gendesi gomberewa ezi zina kurwanesa umbondo mosirongo ndi asi Anti-Corruption Commission gekuto Paulus Noa,age kageve erondoro asi kwato nkenda ogu ono kugazara asi navakutjangerapo hawe divara namvho kwato oyo Muporosi kurona oguvatura akarugane komberewa ozo Phelem Masule kayinkondopekere asi yousili muporosi gomukadi kava mukwete,ogu katente mwene asi age kurugana koruha rovaspecial Field Force komberewa zonene moVenduka,eyi yina kara asi simpe kuvhura vayitare asi usili ndi hawe.Ano ogu gekoro lyendi nye kahere kukamuvatera hawe nage kava dimuhamatere ngesi monomango ana kara.Nkwate ogu gomuporosi nage gumwe galitjangesa koNamcol komberewa zawo zakara koYetuyama moKatutura. Ayo kuna kuzuvhika asi nkwate ogu kapi gakara nonzapo zontambo zomurongonambali ngesi ngano kasi kere sikando sendi sokuhova azi gwane.Umbondo kauwizilirepo paapa kapulire ekoro lyendi aya mutjangerepo gokoPolytechnic gahana kutjanga mwene.Age kagazarere asi nepu natjanga mwene kuvhura apire kupita yiponye asi nepu nagusa ekoro lyendi hawe ngano tarondo.Yimo ana kuyifaturura ngoso Masule.Age katente asi varongwa vahepa kuruganesa mafano gawo pokuhwilira vakatjange.Nampili ngoso posihorokwa esi efano eli kwali danena unene vantu ava vavali.Age kwagusapo efano lyouhunga yiyo vaturapo olyo lyogo ana hara kupopera mukwawo.Awo kapi kava tjilire asi madina kapi taga lifana.Ano pono mbapira odo kapi vaditara vaporosi ndi asi pakare edidiliko nkenye eli.Pwanare vatareli makona -kono kutara tupu kefano nokosipara makura tava muhwilida yimo ana kutanta Masule. Konyima tupu apa kayizuvhayikire vatareli yipo kava kere vana kotoka mokukotoka kwawo awo kapi kava litundilirepo yiyo kava kweteko ava vavali.Ano mokuvakwata yiyo kava tanterereko mberewa ezi zina kurwanesa umbondo.Vatareli kava yakwete muntu ogu age tahara kupwaga mevango eli kava tjangerere.Navenye kavavakwete nekonakono lyovaporosi simpe kuna kutwima.Morwa gumwe gwawo muporosi hena noyitamba yendi udigu owu vana ukandwire momawoko govaporosi koruha oru ava gava masivano nomapisuro yipo vayikona kone.Natuvenye kuna kuyihuguvara asi ekeverero eli kali wizirepo kutunda tupu apa Noa kageve marondoro. Kuna kumoneka nawa nawa asi varongwa vamwe kuparukira movakwaawo,siruwo oso vamwe kuna kutjimpuka vene.Umbondo wangesi kuna kulihanena mwaza sirongo makura vamwe yiyo vatokora kukayirapota komberewa ezi azi rwanesa umbondo.Eyi yiyo kayininkisire mugendesi gomberewa ezi atume erondoro asi owo ava yirugana vahageke ngano tava mono eyi gamwene mbwindi momuduva.Vantu kuna gwana nompito edi vana kuruganesa vaparukiremo.Vatareli tarereni nawa-nawa yipo asi varongwa ava vahakara nampili nakauke vagwane mpito zokuruganesa umbondo.Morwa mukaro gwangesi mberewa zaNoa kuna kugwana nombapira dahana madina dina kugava masivano omu varongwa vana kuuyunga omu nava livatera posiruwo somakona-kono.Posiruwo simwe kuhoroka asi ogu ana kutjanga kapisi yige mwenya yininke eyi kuhoroka morwa sinzi sovanasure kapi vaweka mafano,awo kuruganesa tupu yina ava vafaneke pwahana edina lyendi.Mompito nye ozo vamwe yipo ava yimono asi kuvhura vavatere vakwawo ava yina kudigopera.Ano vamwe kuvatera vakwawo morwa kuna hara yimaliwa.Yimo hena ayi horoka asi vamwe kukatjangera vakwawo nkenye oku vana kukatjangera.Mberewa zo ACC,kuna kuhundira nonkurusure ngwendi Unam naPolytechnic vaturepo nongendeseso dokutengeka owo vana kurugana yininke yokufana ngesi.