Vasingi Womahauto Tava Gwana Yimaliwa

0
8

Nampili ngomu asi ndando zomaholi tazigurumuka vasingi wono taxi kapi vana kugazara kugurumwisako.Nye uwa kuna kara tupu asi ava vaweka mahauto kuvhura vazoragane morwa hansa maholi gana gurumuka.Maholi kuna gurumuka morwa noku aga tundu nako gana gurumuka. Epangero lina gurumwisa ndando zomaholi noyisolinga ronantazimwe molita zimwe kuna gapakerere petrol nodisera.Presidente gona gombunga zava wonobesa ndi asi NABTA Innocent Simasiku katente asi nampili ngomu vana gurumwisa ndando zomaholi hawe varondi notaxi tava futu ngorooro moomu mwanare.Age kagwedereko asi apa vazerwire yikando yivali maholi ose kapi twazerwire unenepo nonzira edi dono nde.Ose kwazerwire rokuhulilira kwakere mwa Pembagona 2006.Ose kwayimwene yina wapa morwa kwazerwire nonopersenta murongo.Ezeruko kwakere ngesi nsene totundu koKatima Mulilo oze koVenduka tofutu N$210 ano ntaantani tofutu N$230,gokutunda koOshakati oze koVenduka tofutu N$105 ano ntaantani tofutu N$115. Ano ava ava ruganesa notaxi modoropa awo ngavafutu N$6. Ano ngesi N$6.50.John Mutton gumwe nage asingi taxi modoropa kapandwire NABTA eyi ana rugana asi kuvhura vagwane yimaliwa morwa vantu tava hafere ndando ozo.Age katente asi makwedi gana piti ose kuna ruganene tupu kufuta maholi kwato yimwe eyi twagwanamo.Mukaro kwakere mudona unene vantu ava vakuta vasinge mahauto govakwawo morwa awo kugwana nzambi zawo kukwama omu vana retamo yiwizomo.Sivike kasipwire uministeli kwageve ntumwaraka asi maholi taga kagurumuka noyisil;inga ronantazimwe molita.Esi yiso sikando sokuhova maholi gagurumuke kutunda tupu apa gatameka kukanduka.Ezeruko mokukwama ministera gonomina Erkki Nghimtina kwawizirapo morwa ndando kwazeruka oku ava gwana maholi mouzuni yipo asi nakunye gahepa kuzeruka. Noyita eyi yina kara moyirongo yomontjima ntjima zouzuni,eyi ngayipura maholi vagarandese molita US$75 ndi US$78.Ano nye ezi mbudi zongwa kuna wizirepo morwa yimaliwa yaNamibia eyi yina hedere koyimaliwa yaAmerika yipo nye asi ndando ngesi zina wapa.MoWalvibay, omu mwakara asi maholi mbiliha kupitakana mavango nagenye moNamibia ako ngesi kuna kara maholi gena goliteti N$6.16 ano aga makwawo kuna kara N$6.44,ano disera kuna kara N$6.50, ngesi taga wizanye ko N$6.17. Nghimtina katente asi eyi kuvhura kulitjindja mosiruwo sosi supi morwa nodola daAmerika kuhara kulitjindja nkenye sivike yipo asi moomu yina kulitjindja ngoso yimo hena nondando zomaholi zina kulitjindja.Nsene tutara mokwedi kwaSitarara mvhura zeezi yimaliwa eyi kwakanduka unene.Age simpe katente asi ava vakererapo ngendeseso zomaholi kuna kutanta asi awo nava kondja yipo asi ndando ezi zahakanduka morwa ezeruko lyonodola daAmerika nye ngano vakare tupu pondando ozo dogoro tupu tumane sinani esi somvhura ezi 2006.