Oonakulwa Aakulu Otaya Totelwa Uuministeli Wawo Uupe

0
8

WINDHOEK Omupresidende Hifikepunye Pohamba okwa katuka onkatu okuungaunga nomaupyakadhi goonakulwa aakulu nokutota po uuministeli uupe mboka tau kala nokutseyika Uuministeli wIinima yOonakulwa Aakulu (Ministry of Veterans Affairs). Omupresidende metitatu okwa tseyitha kutya okwa ningi etokolo okuhulitha po onkatu yominista yaa na uuministeli (Minister Without Portfolio) nokuulika ngoka a kala monkatu ndjika Ngarikutuke Tjiriange a ninge ominista yuuministeli mbuka uupe-pee. Omupresidende ota ti okuza pemanguluko lyaNamibia, epangelo olya kala nokutota po ooproholama dhowina okunengeneka onkalo yopankalathano nuuhupilo waantu mboka ya pumbwa omakwatho. Ta gwedha po kutya omakonakono ga ningwa kepangelo otaga ulike kutya ethimbo olya thikana okutsa omuthindo oshitsa shika sha simana mpoka oompumbwe dhoonakulwa ayehe aakulu tadhi vulu okuungaungwa nadho pamukalo gopauyuuki. “Ngame onda ningi etokolo konima yoonkundathana nayakwetu okutota po sha shoka tashi vulu okuungaunga noompumbwe dhoonakulwa aakulu,” Mokupopya kombinga yoshikumungu shika poshigongi shaanankundana pEgumbo lyEpangelo, mpoka wo pwa li oominista dhOkabinete, Pohamba ota ti epangelo lye otali ka tsikila nokutalulula uuhupilo niihuna yopankalathano yaakwashigwana ayehe, unene aakwashigwana mboka ya pumbwa omayambidhidho moshigwana. “Momasiku 4 Aguste, onda kala nompito okupopitha oshigwana kombinga yoshikumungu shoonakulwa aakulu, nonde shi ulike kutya epangelo lyetu olya tala ko Aanamibia ayehe ye hole oshilongo mboka ya kutha ombinga mekondjelomanguluko lyaNamibia, kutya nee aakwashigwana mbaka oya li muupongekwa nenge kaya li kombanda, ayehe oya talikwa ko aakongelimanguluko aakulu nenge oonakulwa aakulu. Omupresidende ota ti oshi na okukonekwa kutya oonakulwa aakulu oye li paengundu odhindji onkee oompumbwe dhawo inadhi faathana. “Otu na ongundu yaakwashigwana mboka molwomimvo dhawo inaya vulu okumona iilonga muNamibia lyamanguluka, omanga yamwe ya longa ashike omimvo dhontumba konima yemanguluko lyaNamibia omanga inaya ya mopenzela, nongundu ndjika oyo unene ya talika ko ongungu yomapendafule giita.” Omupresidende ota ti ongundu ndjika oyi na oompumbwe dhowina, oshoka omahupilo gawo nomayambidhidho inagi ihwapo. “Shika osho unene etompelo lya etitha epangelo lyetu li tule po ooproholama dha nuninwa okuungaunga noompumbwe dhawo dhika dhowina.” Pohamba ta gwedha po kutya oongundu dhilwe dhomapendafule giita otadhi vulu okuyelithwa shi ikwatelela koonkatu dhawo dhuulongelwe nomaithano gwontumba melongo, omanga yamwe tashi vulika ya kwatelwa mongundu yoothigwa dhaavali ya sila miita. Omupresidende okwe shi ulike wo kutya mokuya moshipala elongitho olindji lyoshimaliwa kaaniilonga noondjambi dhawo, aaniilonga yuuministeli mbuka uupe otaya ka kuthwa mokati kaaniilonga yepangelo muuministeli nomahangano gepangelo. Omutse gwepangelo inagu gandja omauyelele kondandalunde kutya uuministeli mbuka uupe oshinakugwanithwa shawo osha shike naana, ihe ota ti uuministeli otau ka kala noshimpwiyu okuunganeka iinima ayihe yi nasha noompumbwe dhomapendafule giita – oonakulwa aakulu. Omupresidende okwa endulula ishewe etumbulo moshipopiwa she koshigwana ta ti: “Ongepangelo li na olune/oshimpwiyu, otatu ka tsikila okutalulula nokutonatela omahupilo nonkalathano shi nasha niihuna yAanamibia mboka ye hole oshilongo shawo mboka ya kutha ombinga mekondjelomanguluko, nelalakano okunengeneka omaupyakadhi gawo uuna eliko lyetu tali shi pitika. Onkee, ngame otandi indile engungumano, uukumwe yopashigwana nedhiginino lyiilonga opo emona lyetu li koke lyo li vule okuhwepopaleka iihuna nomaupyakadhi gaakwashigwana yetu ayehe.” Pokati mpoka, omupopiliko gOkomitiye yi nasha nOmauwanawa gOonakulwa Aakulu, Alex Kamwi okwa gandja olupandu kOmupresidende omolwonkatu ndjika. Ta ti etokolo ndika oli li oshitopolwa shomakonakono gosheetwapothaneko shokomitiye yawo ya gandja komupresidende Pohamba pethimbo lyoshigongi shawo muJuli 2006. “Tse otwa nyanyukwa. Otatu indile Tjiriange a longe mo iiyetwapothanekwa yetu nomaindilo ngaashi ga pewa Omupresidende pethimbo lyomutumba gomasiku 14 Septemba 2006,” Kamwi ta ti.