Twamukanderere, Kupi Zina Kara “ambulance” Zetu

0
11

Vantu vatunga momukunda gwaOvitoto pepi naOkahandja simpe tava mono runyando rokupira kukara noambulance zokutwaresa vaveli kosipangero sosinene koVenduka. Vamwe asi nampili ngano koOkahandja nye,nampili ngomu asi awo kwava pere ambulance nomvhura ntatu dina pitipo.Ambulance ezi zina karako kwazipungura tupu pembo lyahompa Vipuira Kapuuo,yipo vana kuzihomokera vawidi nokuzonaukirapo.Makwedi gongandi tupu gana pitipo makoso gehauto olyo kavagaveke ntaantani tupu kava nenemo defa.Mukaro gwangesi guna retere mukunda gwaOvitoto ruguwo.Apa katu kondjere asi tugwane nkumbu hompa katente asi ambulance ezi kwazigeve nakufa Moses Tjitendero naAmbassador Peter Katjavivi konyima zapa vantu vatunga momukunda vasivanene asi kwato mahauto gokuvhura kuvatera nsene muntu tavere momukunda gwina. Age katente asi ehauto eli kwaligava momawoko gendi morwa momukunda gwina mwato kansela.Kapuuo katente asi ambulance ozo kwaya zitambwire paveta ministera goukanguki Richard Kamwi novarugani vamwe moOvitoto ano awo yiyo vazigeve komurugani gumwe gomoministeli yipo aka zitjangese koroad authority.Age simpe katente asi ehauto eli kapi simpe valitjangesa likare asi ambulance morwa koyili yimbapira yimwe yazumbana ntani koyili yivera yimwe yina wapere kuyiwapayika.Murugani nye ogo gomoministeli kwakazumba ehauto olyo moOkahandja nokuyatantera hompa asi aka hare ehauto olyo kovaporosi womoOkahandja.”Ame yipo nakaretere ambulance ozo nokuyazitura membo lyange udona wou asi ehauto olyo ere kapi taligwaneke mongarase zange yipo nalitura nye tupu ponze. Ano ngesi tuna karanye nakansela ogu naya tantera asi, twakara noambulance nye zina karanoudigu mokuninka asi tuka zitjangese.Kansela Isascar Kaujeua pomuhowo gapulire asi naruganako yuma nye konyima taka tengura asi ambulance ezi kuna karamo upolitika wokohi ou tuna pilire kudiva nawa-nawa.Kapuuo tayimutukukisa eyi galimbwilire kansela ntani omu kansela yina kumu digopera kukatjangesa ambulance ezi.Ame kapi nina kuyizuvha morwa vantu ava vavali vagava ambulance ezi vaSWAPO ano kansela nage muSWAPO.Komeho aka fe Tjitendero gamugwene hompa tamutantere udigu ou woAmbulance nye nagesi tamutantere asi gahepa kukalikunda udigu ou nakansela gomukunda. Kapuuo katente asi age navhura kutjanga mbapira kwakaKatjavivi apure yimbapira yimwe yipo aya tjangese ambulance ezi ziyaze monzira.Nage kayitambwire asi defa vazivaka nye muwidi vamugwana kuna kundindira tupu aka moneke kompanguro.Hompa katente asi muwidi ogu mundambo age hena mukurona pomukunda kuna kulirundira asi defa ezi kwazitora mowiza.Kansela gomukunda kapi katu mugwene akumburureko kavatutanterere asi ana pwaga modoropa.