Yipangero Kuna Kara Momukaro Gomudona

0
14

Vantu kuna kuyizuvha sili momudona omu yina kumoneka yipangero yimwe, eyi yina kupira kumoneka nawa paukanguki. Yipo ngano muhoko guparuke. Nampili ngomu ava tura kouhaku nobiliyuna dono dola nkenye mvhura uministeli nye ou au fire sinke yipangero ngwendi Central Hospital ngesi kwa karamo uhumi ngwendi nonyiki nayimwe ngoso. Sipangero esi yiso sosinene mosirongo esi nsene asi mukaro gwaso ngoso moomu vana kugusivana ndi asi kuna kara makero omu adi vharere nonyiki, mavango gomanene ngwendi getawiro kuna kara momudona. Ano sipangero simwe sosinene sina kara nomukaro ogo kuna kara sipangero saKatutura. Naso kuna kara nomukisi gokutunda koyimbumburu. Ntani sipangero simwe sina pungura yikakerake kuna kara sa Rundu ano ayo kuna kuli gwederera mwankenye sivike. Muzumo goyi mbumburu oyo kuna kuhomokera yilihokone novaveli nsene asi tavali nondja dawo. Momandaha aga kagapwire mugendesi kurona goukanguki moKavango Elizabeth Muremi kayi nkondopekere asi yousili yimbumburu eyi moyili mosipangero. Ano varugani kukondja moomu vavhulira vadipage uhumi ou, vaveli vamwe novatareli vawo vahepa kugusa situmbukira esi. Age katente asi vadinguli kuwiza kovaveli nonondja dononzi, yipo asi muveli ogo kapi namana nondja odo posiruwo simwe tupu. Yipo nye asi nondja odo tava dipungura mosikopa konyima nondja odo tadi zigida nye nontilibwe. Ose narunye kukambadara kutantera vaveli vetu asi vahapungurasi nondja mononzugo odo ava varara. Vantu vetu vahepa kuva ronga yimo ana kutanta. Sipangero sa Rundu kwakara nonombete dovaveli dokusika ko250. Ano mukurona gendesi sipangero saKatutura Rheinhardt Gariseb kapulire tupu asi udugu pouli. Age simpe kafatwilire asi sipangero esi kwasitunga mo 1973. Mokukwama mwendi sipangero esi kwasitungire sivatere tupu vantu wovasesu. Moomu ana kukura Namibia kapisi meparu mwelike nye novantu omu vanakulivhara yihepwa yomo sipangero nayo yahepa kuyirundurura kukwama muhoko. Apa tuna kara ngesi sipangero saKatutura kuna kara sipangero sosinene oku vana kukandwira vaveli navenye womosirongo, esi. Aso kwa kara nonombete 831, yimo ana kutanta Gariseb, age simpe kagwedereko asi sinzi sova veli ava avatumu vatunde konomukunda peke awo kuvahakura usimbu yipo vatengure vagaveko evango. Ose kuna kara noudigu woyiruganeso nye tatukondjo ngorooro. Gumwe ogu kauyungire kwa New Era katente asi nonyiki edi dina kara kositawiro somo Central Hospital kuna kureta woma kovaveli nava vana kuvakeverera. Age katente asi vaveli kuna kurara noutjirwe morwa yimbumburu yokutuka eyi kapi yawapa moomu yina kuhuma vantu wokulisiga- siga yimo hena yina kuhanesa mukisi. Ose katu kondjere asi ngano tuzuvheko nkumbu komukuronagendesi sipangero seCentral Hospital Sara Shalongo nagesi kapi kapulire ndi asi apatane. Ame kapi nina siki posiruwo sokuninka asi nilimburure. Ano hamutjanga gokukarereramo mouministeli woukanguki Kalumbi Shangula katente asi oyo yoyikakerake moRundu vaveli vene yiwo navapa umbondo. Vantu kapisi hepero vapungure nondja moyikopa. Age kapulire asi yousili nonyiki mo Central Hospital yimo dakere nye ngesi mwato.