Otjisuta Ngatjihitisiwe Mozondjuwo Zozoveta

0
8

I Kae Matundu-Tjiparuro OKAHANDJA Ohepero otjira tjOvandoitji tjopolotika okanepo kondjuwo yozoveta ihi o Social Democratic Party, poo o SDP, nova kawondje va punatjo mo ndjuwo yo zoveta indji, o Bundestag, okuhitisa ombepo kutja o maningiriro wo ndjesiro notjisuta tjombindu yOvaherero ndinondi ririre epu ehungiriwa korutuu romahungiriro ro Vandoitji, okanepo oka kuru kondjuwo yozoveta ya Namibia, Moses Katjiuongua, matja. Omayuva womasuviro otjiwana tji tja kayamberere kOkahandja Katjiuongua wa hungirire pomariro wokunwonga otjimariva wo komiti yOtjitiro Otjindjandja. Watjere ape yarire ozombura mbari o Ministera yehi rOvandoitji yOmaunguriro Kumwe mOmbwiko nOmekurisiro, Heidemarie Wieczorek-Zeul, tjaningira ondjesiro po mazemburukiro wozombura esere zovita vya Hamakari. Posyo Katjiuongua watjere omaningiriro wondjesiro ngehina kukongorerwa iyo tjisuta ka ye yayenena nomambo mombepo uriri. Ovitjitua okuza ko maningiriro wondjesiro ovini vye rihorora kutja otjo tjiri nagwari omaningiriro wondjesiro yari omambo wo motjinyo uriri. Ka unepo wotjira tja Wieczorek-Zeul porwe mbwa nakaura otjisuta nungwari eye omwini wauta etiku ro “Ndunge ya Peke” otjondunge ko horomende ya Namibia kukuheri kOmbara Otjitambi yOvaherero, Kuaima Riruako. Katjiuongua wa yarurapere ongurameno yOvaherero no mambo inga:”Ovo kavena otjina kutja o naindji ndji makuzu Ombwiko yOndjesirasaneno poo okamutjira kayo kumakuzu Ondunge ya Peke.” Watjere ohoromende yOvandoitji ka i yiutire okutaka taka uriri nungwari otjiwana atjihe tjOvandoitji tjahanika. Tjingetjo ohoromende ya Namibia ndjatjere iraisa oku hina kunatja motjisuta ku kukurirako, wina yasere okuhitisa ombepo mondjuwo yozoveta kutja epu indi ri rire rehi arihe kotjiveta kutja ri yenene okuvasisiwa kOtjombanguriro tjo Uye tjo Usemba wOvandu ko Hague. Katjiuongua wa rakizire kutja ovandu ngaa veroro ave kambura oveta momake wao oveni tjina minda tjiva tji vivanga nandarire mo uranga ranga wo horomende ya Namibia. “kapena ounane wa Namibia wo merizirira, nandarire ovanane vo Vaherero, maa vevanga oku undurirwa kongaro yo zombuku. Ouzeu wetu ka Vandoitji ohoromende yehi rOvandoitji,” wayandjere ondunge indji. Katjiuongua wari no ngamburiro yo kutja Ovandoitji mehi rOvandoitji nawina mo Namibia ka naa veriyandjere okuungurisiwa okuningirira po ohoromende yOvandoitji ondjesiro kourunde wayo wotjitiro no huurire. Ngunda ongaro pokati kozohoromende za Namibia nehi rOvandoitji aya zikama korupe rwao “ovana rusuvero nehi rao mbehungira Otjiherero ngunda vena ondjakaha nehi rOvandoitji”. Watjere ohoromende yOvandoitji i ivaiva ndoovazu kaina omirungu vivari nu kaina owatjiri mo ku taka taka pokati ko una o u poro poro moveta no ngaro youndu. Nambano nai otja ndji makuzu ondjesiro yaningirwa tji tjaseua po omyano vyo kutja otjisuta matji yandjwa vi. “Ndoovazu ohoromende yehi rOvandoitji ona uyara iyenena okusuta ozondjo zomauvi wa Hitler ongwaye tjii hasere okusuta ozondjo zomauvi wehi rOvandoitji ro mu Keisera Willem?”wapurire. Watjere oku hina ombango ko ma uhonapare wa Europa oku hungirira kepu indi o ku tira kutja varwe mave paturura omeho na veye hungama ohunga no mauhazendu wayo moruveze ro huurire.