Vamitili Yiwo Mbuto Zetokomeno Lyetu 2030

0
9

Epongo eli vandindira lyaNantu kalitamekere momandaha aga ganapuko ano epongo eli kali kere moRundu.Epongo eli kuna kara lyouhambontatu alyo ngali kara tupu lyomazuva gatatu ndi asi kwahaga moutatu. Alyo kali zegwilire ministera gerongo gekuto Nangolo Mbumba.Ministera kakakwatereremo presidente Hifikepunye Pohamba ogu vazigidire ngano aka paturure epongo eli paveta.Mombudi zendi kauyungire asi erongo sininke somulyo kwawapera vantu navenye valituremo. Epiro kulituramo lyovahameni navenye yiyo ayi retesa po yitundwamo yipire kuwapa ndi asi vanona womonosure depangero vapire kutompora. Petameko tupu lyomvhura ezi uministeli werongo kwaukuyaukire ava vahamena merongo rambangako napresidente googu mokukwama tupu yitundwamo yontambo zomurongo nezi zomurongo nambali.Nampili ngoso uministeli wendi walituramo nokutara asi vagwederereko nonkondwa rongero ntani nokukambadara asi nomukunda dimwe oku kwapira vamitili vatwareko vamitili mokuyinkondo peka oyo tundindireninye mvhura ezi.Ministera ogu kauyungisire konyara vazigindwa wokusika ko 300, katente asi ngendeseso zerongo ezi tuna kara nazo ngesi kuna ziruganesa nomvhura 16, yipo asi kuna kuliza nekuliko lyetu netokomeno lyetu 2030. Uministeli kuna lituramo ngesi mokutara asi ngendeseso zerongo ezi zahepa kuwapera noyihepwa yetu kupitira momalideuro gombunga ezi vana kutumbura asi (ETSIP) “Education and Training Sector Improvement Programme”.Mbumba katente asi nsene kapi natu lituramo nyamwetu novavateli verongo hawe nonkambadaro nadinye tudivare,rambangako Nantu nsene kapi ana kuvatera uministeli werongo mokupapara mbatero yipo tuture nkenye eyi tuna hara moyirugana .Mokurugana nye asi tusikisemo egano eli epangero lyatokora kutuma vadinkantu wovaNamibia vakalironge koZimbabwe vakavadeura moumitili yipo ngava yavatere sirongo setu merongo noyihepwa yimwe ngoso. Mbumba simpe katente asi uministeli wendi kapi au tokora tupu nye kupurako mbunga ezi zakarerapo vamitili za Nantu.Uministeli werongo nkenye apa ngaupurako mbunga zeni nsene asi kwakuuyunga yoku hamena erongo lyosirongo esi. Age kahundilire vamitili vakare mpita meho zositambo setu so 2030. Posiruwo sooso presidente ogu ana karamo ngesi gwaNantu, Ndapewa Nghipandadula,kapandwire presidente Pohamba kehundiro lyendi netokoro lyendi asi vanona navenye ava vana kuza montambo zomurongo vavatambure mononkondwa rongero.Mokukwateramo vahameni vaNantu navenye tani pandura presidente Pohamba koumpitisili wendi rambangako novavateli vendi ava vana kugendesa epangero eli. Nage simpe kageve ruguwo kweyi yokupira nonkondwa rongero,epiro lyovamitili wokulironga nawa,epiro yininke yokurongesa ntani edopo lyenene monosure ogo yigo maudigu gomanene tuna kara nago. Yinzi yina wapere kuyitjindja mongendeseso zetu zerongo kutunda tupu apa samanguruka sirongo nomvhura 16 dakukapita,yimo ana kutanta Nghipandadulwa. Kapi toyipura muntu asi vanona wontambo zomurongo nava womurongo nambali kuna kudopa makura mavango gava wontambo zokuhova kwato morwa yeeyi vana kudopa vakuru vawo. Nahena kapi toyipura asi okare membo nomuntu gakatunda koUNAM nye kwato yirugana. Hamutjanga ntoni gwaNUNW Evalistus Kaaronda katente asi ngendeseso ezi zina kara koNamcol kapi vana kuzitambura, morwa ngesi Namcol ana kara evango lyokuzugumina ava vana kupira kutompora merongo lyokuzulilira. Age katente asi apa vamutotapo Namcol kwakere negano asi tavatere sivaro esi sina kuvhuka sovantu vana hara kulironga ano ngesi kuna karako tupu vaava wokudopa.Nantu kukara nepongo lyangesi konyima tupu lyonomvhura ntatu kutunda apa vana kuponga yipo valiyonge eyi varugana neyi nava ka-rugana monomvhura odo dina kuwiza. Epongo lyawo eli kuna kukahorowora hena nompitisili donompe vakarugane nomvhura ntatu odo dina kuwiza.