Omaindilo gOmumvo 2007 Okutaambelwa mOosikola Ga Thikana

0
5

WINDHOEK Ominista yElongo Nangolo Mbumba oti ndile oosikola adhihe dhoka inadhi tseyitha natango omahala gOndondo yOtango (Grade 1) kaanona mboka taya tameke osikola omvula tayi ya, dhi shi ninge ngashingeyi opo ku shilipalekwe etameko epe lyoosikola tali ende nawa omvula twa thinda. Omukundu gompumbwe yomahala mooprimasikola noosekundosikola ogwa ninga omukalondjigilile notagu tsikile okugeyitha aavali oshowo aanasikola. Oshiwike shika, uuministeli welongo owa tseyitha omalandulatano nomilanduveta dhoka dhi na okwiiyuthwa kudho koosikola adhihe opo ku shilipalekwe etameko lyosikola tali ende nawa momumvo 2007. Minista Mbumba ota ti omataambo moosikola okwa li ge na okutameka nale momwedhi Juli 2006 nokwa tegelelwa ga hule muSeptemba nuumvo. “Omaindilo getaambo moosikola moondondo dhontumba oge na okutameka muJuli 2006 nokuhula momasiku 29 Septemba 2006. Oosikola dhoka inadhi tameka otadhi dhimbulukithwa dhi tameke moompadhi oontalala oshoka odhi na ko natango omwedhi nguka Auguste naSeptemba okumanitha omataambo gadho,” Mbumba ta ti. Oosikola okwa tegelelwa dhi tseyithile aavali ngele aanona yawo oya taambwa nenge aawe andola manga omasiku 13 Kotoba 2006 inaga thika. Omolwoshinima shika, uuministeli otau indile oombelewa dhopaitopolwa, aakuluntusikola nomalelo goosikola ga tule miilonga omautho ngaashi ga tulwa po kOveta yElongo. Mokati komilanduveta dhoka omwa kwatelwa oshitopolwa shOveta yElongo shoka tashi ti omunasikola e na okutaambwa mOndondo yOtango (Grade 1) oku na okukala e na oomvula hamano omanga omumvo ngoka ta ka tameka inagu thika nenge momasiku 31 Desemba sho osikola tayi ka tameka muJanuali omvula ya landula ko. Moku shi taamba ko kutya otashi vulika pe na aanona yamwe mboka tashi vulika ye na oomvula odhindji dhi vulithe dhoka dhokutameka osikola, minista ota ti iiningwanima yoludhi ndoka oyi na okutumwa kuAmushanga Omukuluntu muuministeli mbuka opo yi ziminwe omanga aanona mbaka inaya taambelwa mosikola. Aanasikola mboka taya yi moGrade 11 momumvo 2007, iinakugwanithwapo yopevi okutaambwa mondondo ndjika oya tulwa po nale. MoGrade 10 oshowo Namcol aailongi mboka ya mona iitsa 24 noye na osimbole E nenge yimwe yi li hwepo mOshiingilisa oye na okumona ompito ya faathana okuya moGrade 11. Shika oshi li onkambadhala yehumithokomeho okumona iitsa 27 mbyoka tayi tegelelwa opo omunasikola a hume kondondo ya landula ko, osho minista ta ti. Etaambo moGrade 11 itashi ti omunasikola okwa taambwa nale momuhandjo gosikola. Minista oti indile natango aavali mboka aanona yawo tashi vulika inaya mona omahala okuthika momasiku 13 Kotoba nuumvo, ya ye koombelewa dhelongo dhopaitopolwa nokugandja omikanda dhaanasikola mbaka opo ya monenwe omahala.

SHARE
Previous articleBafana Strike It Lucky
Next articleHIV Therapy On Target