Bayahi ba Kwalelwa Mezi

0
7

WINDHOEK Bayahi ba Kalkrand neba kile ba ina lihola ze mashumi a mabeli kaze nee (lizazi mutumbi) ba sina mezi a kun`wa, mwamazazi a felile. Simpangaliko se nesi bonwi la bulalu sunda yale ye felile kuisa la bunee ka kusasa. Mezi na kwaluzwi la bunee kono bayahi neba kile ba fitisa linonge za kuli, mezi nasa zwi hande hahulu sina ka mita kwa’lipompi’ kaufeela. Yo Muhulu wa kansulu ye zibahala kuba ya haesu kapa yona kansulu ya munzi isi tolopo, mutompehi Ludwig Denk na kile a taluseza ba mutayi wa makende o kuli, mezi na kwalilwe kakuli ne kubile ni butata kwapaipi- tuna yen`wi ya mezi ye sululela mezi kwabayahi kaufeela ba munzi onze u sweli kuzwelapili kuli ube tolopo sakata mwalilimo ze taha. “Babeleki ba kampani ya NamWater neba kile ba sebeza fa paipi busihu kaufeela kuli ba kutise lisebeliso kaufeela za mezi hande sina kamita,” na talusize. Kakuya ka muyahi yo mun`wi, Magrita Van Wyk, maofisa ba kansulu neba kile ba zamaya tolopo ya munzi kaufeela banze ba taluseza bayahi kaufeela kuli ba beye mezi mwalibyana, kakuli mezi nata kwaliwa ka mazazi a mabeli. Kono kakuya ka musali ya swana hape kabumai, lin`usa mwalibaka zen`wi neli kile la fita ka kulyeha kakuli mezi nasa kwalilwe kale. Van Wyk naize maofisa neba kile ba fitisa lin`usa ka nako ya ka kusasa hala hola ya bu lishumi ni bulishumi ka hola I lin`wi ili nako yeo bun`ata bwa libaka nese li kwalezwi kale mezi mi lin`usa la kuli mezi nata kwaliwa ka mazazi a mabeli neli kile la siya sicaba sinze si ‘mata – mata’ lizazi kaufeela ni kusi siya mwasabo-tuna. “Nese kusina mezi ka nako yani mi batu nese ba tatekile kale mi musebezi wa kuka mezi kwasimbule si sili kwasiteshini sa kwanjanji,” Van Wyk na fitisize nonge. “Batu ba ban`ata neba kilwe ba bonwa banze ba matela kwasiteshini kuyo ka mezi mwamahemele. Mubamba ne u sa bulelwi,” musali na ekelize.