Iilyo yoSwapo pEenhana Ya Kundathana Etopauko

0
7

EENHANA Omatopauko konima yomahogololo gwontumba shoka sha ninga omukalondjigilile mongundu tayi pangele Swapo, omukundu nguka ogwa kundathanenwe poshigongi shewawa lyaakiintu yomelelo lyopashitopolwa shaHangwena shoka sha gongalele omwedhi gwa zi ko pEenhana. Mokupopitha iilyo petameko lyomutumba ngoka, Omuunganeki goSwapo moshitopolwa shaHangwena, Nestor Shuukwanyama okwa holola eiyuvonayi lye shi nasha nomaihumbato gaakomeho yamwe mongundu pandondo yopashitopolwa oshowo pamuthika gopashigwana. Shuukwanyama ota ti aawiliki yamwe otaya eta evundakano mokati kaayambidhidhi yongundu molwashoka ihaya simaneke iilyo iikwawo nokwiiyutha komatokolo gopaudemokoli taga yambidhidhwa koyendji. Aawiliki mboka yontumba, Shuukwanyama ota ti ohaya ngwangwaneke aayambidhidhi yongundu oshoka ohaya ula iilyo iikwawo omadhina ngele okandidate yawo inayi sindana momahogololo gopaudemokoli ngoka haga ningwa meni lyongundu. Shuukwanyama okwa nyana wo iilyo yimwe yoSwapo mbyoka hayi kala tayi shundula nokunyateka omadhina giilyo iikwawo yoSwapo mbyoka tayi yambidhidha okandidate ndjoka inayi sindana momahogololo. “Otwa pumbwa okuhangana ongiilyo yongundu nokwaapitika omatopauko mokati ketu molwashoka okandidate ndjoka tatu yambidhidha inayi shi enditha nawa nenge okushundula yakwetu molwashoka okandidate yawo inayi sindana mehogololo” Shuukwanyama ta indile. Okwa gandja ishewe ombedhi kiilyo yimwe yoSwapo mbyoka yi na omukalondjigilile okuhogolola aawiliki yongundu shi ikwatelela kuukwamuhoko nenge olwaala, ta ti ongundu yoSwapo oyo ongundu tayi lalakanene okuhanganeka Aanamibia ayehe itaa ku talwa komihoko, olwaala neitaalo. Mokupopya poshigongi osho tuu shoka, kansela goshitopolwahogololo Ondobe moshitopolwa shaHangwena, Mandume Pohamba ota ti ongundu yoSwapo itayi ka vula okuhuma komeho ngele iilyo yayo otayi tsikile nokwaatsakumwe nokukala ya topauka kombinga yomatokolo gopaudemokoli ngoka taga ningwa. Okwa londodha wo iilyo iikwawo mbyoka tayi pula aniwa omupresidende goSwapo, Dr. Sam Nujoma a gandje oshipundi shika kOmupresidende Hifikepunye Pohamba, ta ti eindilo lyawo ndika itali popilwa noka li li pauyuuki. Mandume Pohamba, ngoka e li omonamati gOmupresidende Pohamba, ota ti omimvo ntano dhaNujoma okukala mombelewa yuupresidende wongundu yoSwapo otadhi pu ko (kwishi) momumvo 2007, onkee kashi li pakotampango lyongundu oshilyo shontumba shi mu pule a thige po ombelewa pethimbo ndika. Mandume Pohamba ta yelitha kutya omupresidende gwongundu ota vulu awike okukuthwa koshipundi/mombelewa omanga ethimbo lye lyokulela inali pwa ko ngele okwa longa oshinima shontumba shoka shi li ompinge nekotampango lyongundu. Aakiintu oyendji okuza moshitopolwa shaHangwena oya gongalele poshigongi shoka.