Orwaze rOngoronomundu Po Kapps Farm

0
7

I Kae Matundu-Tjiparuro OTJOMUISE- Ovasuvere voviritje, tjinene vyotjira ihi Ongoronomundu, omayuva womasuviro inga veri morwaze poruveze romasekiro nomerinaneno indui o Kapps Farm muhuka tjimarusekirisa otjimbumba ihi tjitjiri tjimwe tjovimbumba ohongora moviritje. Oruveze indui ondjirakati ape ozokilometa 20 okuza mOtjomuise okuyenda korutjandja rozondera indui o Hosea Kutako, maruhumburisa ovasuvere voviritje ouningandu wnokuveputenisa kutjiva wo u muzumbi oupe wotjimbumba ihi mbu rongerisirwa omboronganenno youmuzumbi watjo oupe mbu maupitisiwa ombura indji kombunda. Ovitjitua imbi maviwongere omapitisiro womboronganisiro indji otjimariva. Okutara nokupuratena otjitjitua ihi matjirire otjitjitua tjomatundu okuyapamwe nokuyoroka tjinga matjiutu mOmbari yomutenya okuyandjera omatundu okuuhara ama yerinana nokutereka ounyosa nyosa wao mbu mayetuarere pomakara ngunda Ongoro oini aihiyeya kondongamo mohambombari yongurova. Otjiperendero tjomuzumbi tjotjira ihi otjitenga matjiraisiwa poruveze indui kotjiraisiro eotjinene otjorupa rotjimariva tjimatjisutua pomuvero ozondola za Namibia o 30. Ounuwa outarazu maurandisiwa imbo nu munao ovayenda otjivehina kuyandjerua okutuaerra ounuwa wao. Kwimba porumwe ongurova kuyarire ondeu okuhina okuyenena okuhinga okuyaruka kozoyao, onganda indji inomara nguma yesutua mongurova. Ongoronomundu ndjarukirwa kongoro nomundu ndjiri mondivitivi yotjihuro tja Tjomuise, yauta okutjiukwa kotjiwana mena rotjiperendero tjayo tjena Ngutukiro, tjitjaraisiwa kombepo momapitisiro woviperendero mbinyinganyinga vyo NBC komurungu womukandi momazemburukiro wozombura 15 zongutukiro ya Namibia ombura ndjazuko. Otjiperedero ihi ye tjikongorera tjiyakara norupa ounamwinyo pomukandi imbo. Nu tjingetjo wina ombura indji avekara norupa wina ovanamwinyo momukandi wongutukiro. Okuzambo ovo kaveyarora okuyaruka ombunda kaparukaze. Omwini wo Kapps Farm, Onongo Tjiuma Kamuruao, ongwa tjiti ouharupu imbwi kotjira tjOngoronomundu oku tjitunduuza mongondjero yatjo okupitisa omboronganisiro oitjavari yomizumbi vayatjo. Ovaharupu varwe maveyakurwa okuyandja ohambwarakana ndjimavevanga pendje notjimariva tjopomuvero. Tjeri otjimariva matjiyenene okuhitisiwa mokambo kombwiko kokuheka kotjira ihi pOmbaanga ya Tjomuise porupa rwo Horongo. O nomora indji o 8000995569.