Elundululo lyOveta yOmalovu Otali Yi Nawa Komeho

0
12

WINDHOEK- Konima yiiwike yomalimbililo nengwangwano enene mokati kooyene yoombashu noondingosho shi nasha neyamukulo lyEpangelo kombinga yiihuna mbyoka taya mono omolwepato lyomangeshefelo gawo, Uuministeli wIipindi nIikwafambulika owa tseyitha eyokomeho lyokuvuta po omilanduveta noompango oompe dhi nasha noshikondo shika. Kakele otashi vulika pu ka holoke ekatasho shi nasha nokunyolela ooveta dhika membo lyepangelo omolwekitakano lyomukundu nguka oshowo ompumbwe okugwanitha po iinima yontumba kaadhaninkandangala yalwe muunangeshefa mbuka, mboka taya yambidhidha aakwashigwana omayovi mboka ya gumwa komukundu nguka. Momushangwahokololo, Ominista yIipindi nIikwafambulika Immanuel Ngatjizeko oti indile ooyene yoombashu, oondingosho nomalelo gopaendoolopa niitopolwa ya gandje eyambidhidho lyawo opo elundululo lyoveta li sindane muuwanawa wawo. Okwe shi koleke kutya uuministeli we otau kambadhala ngaashi tau vulu okweendeleleka elundululo lyoveta. Olyomakaya ga zi ko, Uuministeli wIipindi nIikwafambulika owa ningile oshigongi naanashipundi ayehe (oomengestrata yopaitopolwa) mboka ye li aanashipundi yuukomitiye wu nasha noolisinisa dhokulanditha omalovu opo ya kundathane etulomiilonga lyoompango dhEpangelo dhoka dha totwa po nelalakano okuungaunga nuupyakadhi wongashingeyi wu nasha noombashu. Omanga nee oshigongi shika sha gandja omauyelele omape koomengestrata nkene etulomiilonga lyooveta oompe li na okweenda, opwa etwa ethaneko ku ningwe oshigongiilonga muule wiiwike itatu tayi landula. Oshigongiilonga shika otashi ka kala ompito moka tamu ka kundathanwa etulomiilonga lyoveta mOshitopolwa Omusati nelalakano okutula po omulanduveta gopauyuuki gu nasha netulomiilonga lyOveta yOmalovu moshilongo ashihe. Oshitopolwa shaMusati osho unene sha gumwa komuyalu ogundji goombashu noondingosho. Mehuliloshiwike lya zi ko, omupresidende gwEhangano lyOoyene yOombashu (Namibia Shebeen Association – NASA) Veripi Kandenge okwa popitha oshigongi shoka sha kalwa kooyene yoombashu omathele mboka ye li iilyo yoNASA. Kandenge ta ti Epangelo olya ndopa okuulika ehalo lyopapolotika moshinima shepato lyoondingosho. Kandenge ta tseyithile iilyo yehangano lyawo kutya okweenda kashona okumonena omukundu nguka eyamukulo lyombala otashi ulike okwaanehalo kopapolotika okuza kepangelo. Iilyo yoNASA poshigongi shoka oya ningi omatilitho kutya oshiwike tayi ya otaya ka longekidha iikonga yilwe yomahololomadhiladhilo yi li ompinge nepato lyoondingosho. Shika ngele osha ningwa otashi ka kala oshikando oshititatu shomahololomadhiladhilo oshinene tashi ningwa okuza sho iikonga yopolisi ya tamekele okupata oondingosho noombashu oomwedhi mbali dha piti. Kandenge metiyali okwa tseyitha kutya ongundu ndjoka ya thikama po mooyene yoombashu oya gongela po etata lyoshimaliwa shoka tashi pulwa okumona ekwatho lyopaveta. MOlyomakaya, okwa popi kutya ehangano lyawo otali ka pumbwa N$9 000 okufuta aanawino miikwaveta opo ya pewe omayele moshinima shika. Oshigongi shimwe shoNASA otashi vulika shi gongale oshiwike tashi ya mpoka tapu ka ningwa omatokolo geyokomeho moshinima shika. “Tse otwa hala Epangelo li popye natse, li tu lombwele kutya oli li peni sigo oompaka moshinima shika oshowo mpoka li wete pe na omaupyakadhi. Tse inatu hala okukala oohamitsemikukutu, ihe otwa hala eyokomeho moshinima,” Kandenge ta ti. Paye ekwatathano li nasha neyokomeho okuza kEpangelo kali li nawa. “Ileni ashike kutse mu tu lombwele: NASA, shika osho twa hala opo tse aawiliki tu vule okutseya shoka shi li po nokutseyithila aakwashigwana,” omupresidende goNASA ta gwedha po.