Oshikoto Sha Totha Mo Ooprojeka Dhomapendulopo

0
6

TSUMEB Oshigongi shi nasha niiyetwapothanekwa kombinga yomapendulopo taga yambidhidhwa (koMillenium Challenge Cooperation – MCC) osha gongalele metiyali poombelewa dhElelo lyOshitopolwa shaShikoto mOshomeya. Omutumba ngoka ogwa kalwa kookansela yomoshitopolwa shika, aakalelipo yuuministeli wayooloka nomahangano gepangelo nelalakano okutaamba ko iiyetwapothanekwa yaakuthimbinga okutotha mo omalalakano gwontumba ge nasha nomapendulopo oshowo omathaneko okupendula po ekoko lyeliko nokushunitha pevi onkalo yoluhepo moshitopolwa shawo. Millenium Challenge Cooperation – MCC oli li ehangano lya totwa po kepaneglo lyaAmerika-USA nelalakano okuungaunga noakaunta yedhina Millenium Challenge Account – MCA yoma-pendulopo. Omuunganeki gopashigwana goMCA, Penny Akwenye ota ti, oMCA okwa li ya totwa po momumvo 2002 okugandja oonzo nomakwatho kiilongo mbyoka yi ipyakidhila nomapendulopo gayo. “Ombelewa yaNamibia okwa li ya totwa po okuninga omathaneko nokutula miilonga oproholama yoMCA moNamibia,” Akwenye ta ti nokugwedha po kutya USA okwa tokola okugandja oonzo dhopainiwe kiilongo mbyoka yi na iiyemo iishona opo yi vule okupendula po ooproholama dhomahumokomeho paliko okupitila moMCC. MCC otayi tegelele oshilongo shi tothe mo omalalakano gwontumba ge nasha nomapendulopo, omathaneko nokunkondopa-leka iikondo mbyoka ya simana mependulopo lyeliko nelalakano okukandula po oluhepo moshilongo. Omunambelewa omukuluntu mOshikoto, Tshikarepo Andjamba okwa gandja ethaneko lyoprojeka yopashigwana yokumuna oondjuhwa, moka aakwashigwana taya vulu okutekula iikwamawawa nokulanditha po oondjuhwa dhika nelalakano okwiimonena iiyemo.