Omauliko gwOtango gOpaipindi mOndangwa

0
17

OSHAKATI Elelo lyOndoolopa yaNdangwa melonge-lokumwe naanangeshefa mondoolopa ndjika otaya ka longekidha omauliko gwotango gopaipindi okuthika pehulilo lyomwedhi Apilili nuumvo. Shika osha tseyithwa kuMenindja gwIilonga nOmapendulopo gEmona mOndangwa (Corporate Services and Economic Development), Ismael Namugongo. “Omvula 2006 oyi li ondjokonona ya simana kElelo lyOndoolopa yaNdangwa oshowo oshigwana shaanangeshefa yomoshitopolwa sho iikondo mbika iyalli ya hangana nokutota po ewiliko lyopamuhanga okuungaunga noku-longekidha omauliko gwotango gopaipindi mOndangwa,” Namugongo ta ti. Ota ti elelo lyondoolopa pamwe naanangeshefa yamo oye shi koneke kutya ondoolopa opo yi hume komeho nokuhwepopaleka uuhupilo waakalimo ayehe, iikondo mbika yopaali oyi na okulongela kumwe nokukutha ko iinima ya guma omapendulopo miikaha yawo yene nokwaadha omalalakano gwontumba. Okupitilla moprojeka yawo ndjika yopamuhanga, omasindano ogendji otaga vulu okwaadhika shi vulithe okulonga muuwike. “Shika osho sha etitha elelo lyondoolopa nelelo lyondoolopa yi longele kumwe nokweeta po edhiladhilo shoka tashi ka tseyika nedhina Ondangwa Trade Fair Corporation (cc), ehangano ndjoka li na omalalakano galyo gethimbo efupi oshowo ethimbo ele.” Namugongo okwa totha mo omalalakano gethimbo ele ngaashi okutunga po omatungo gopaulikilo taga kalelele mOndangwa, moka tamu ningi hamu ningilwa omaulikilo gopaipindi, oshowo ehala lyiigongi tali vulu okugongalelwa. Kombinga yomalalakano gethimbo efupi ongaashi okweeta po oompito ombwanawa kaanangeshefa naanafaalama ya vule okuya momakwatathano nayakwawo, okutunga po omakwatathano nokukumika ekwatathano pokati kaanangeshefa aashona naamboka opo taya tameke mo-shilongo, nokutula po ekwatathano pokati kaanangeshefa, aalongi yiilongomwa oshowo ookasitoma. Pamaiyuvo gaNamugongo, omalalakano ngoka otaga vulu okwaadhika pakuninga omaulikilo gopaipindi gokomumvo oshowo okupitila momayambidhidho gopainiwe okuza moshigwana oshowo aayambidhidhi yalwe. “Ngaashi omalelo galwe gopaendoolopa moshitopolwa Oshana, Ondangwa kayi na oonzo dhi ihwapo ngaashi wo shi li oondoolopa dhimwe moshilongo. Aantu oyendji oyendji oyi ikolelela kiipindi yopandondo yopevi oshowo uunamapya, noshi li awike okupitila miiningwanima yoludhi nduka eliko lyondoolopa tali vulu okuyambulwa po.” Ngele endiki lyiipindi olya tungwa nomauliko oga ningwa, Namugongo oku na eineekelo kutya otali ka eta po ompito ombwanawa yokupindika netopolelathano lyomaunongo kaapindiki nokuninga po omakwatathano ga pumbiwa pokati kaanangeshefa aashona naamboka yopokati, oshowo aanangeshefa yakwalukehe.