Openzela yAakulupe Ya Gwedhwa

0
17

WINDHOEK Aakulupe yamwe moshilongo oya taamba ko egwedhelo lyoshikwiila shawo shoka sha gwedhwa okuza N$300 tashi ningi N$370 komwedhi. Kakele yamwe oye uvite kutya uuhupilo mboka tau pula oshindji pethimbo ndika oodola N$70 dhoka dha gwedhwa ko itadhi ka eta po eyooloko. Ominista yIimaliwa Saara Kuugongelwa-Amadhila oshiwike sha zi ko okwa tseyitha egwedhelo lyoodola N$70 kopenzela yaakulupe, dhoka taye ke dhi kwata pehulilo lyomwedhi nguka. “Tse otwa nyanyukwa sho Epangelo tali tala wo koompumbwe dhetu. Ethimbo ele, oshimaliwa osha kala inashi gwana, nonando ngashingeyi natango inashi gwana, ihe oshi li onkambadhala ombwanawa,” osho omukulupe gumwe ta ti. “Okamaliwa kehe okashona taka pewa aakulupe moshilongo shika okuza kOmupresidende gwetu omupe oke li eyambeko enene. Kalunga na yambeke epangelo ndika,” osho omukulupe omukwawo omunamimvo 60 ta ti. Ta ti shika oshi li endhindhiliko lyomauwanawa ge li komeho. Aakulupe mboka ya ningile ehololomadhiladhilo lyegwedhelo lyopenzela yawo omvula ya zi ko, taya pula N$700 komwedhi, egwedhelo lyongashingeyi oli li kokule noonkondo naashoka kwa li ya hala. Aakokele yamwe oye uvite kutya oodola N$370 komwedhi inadhi gwana okukandula po oompumbwe dhawo dhesiku, kwa gwedhwa omutengi gokutekula oothigwa naanona mboka ya pumbwa ekwatho mboka ye li metonatelo lyawo. “Konima yokulanda ashike okashako kuusila wepungu, osuuka, otee, omboloto nonyama mosikola itapu hupu we oshimaliwa okufuta omeya nolusheno,” osho omukulupe gumwe ngoka ta tekula aanona yaheyali ta nyenyeta. Veronica De Kerk gwEhangano lyOmapendulo gAakiintu (Women Action for Development -WAD) okwa hololele eyeme lye kutya aakulupe oya ningwa aatekuli yaatekulu yawo nonando ye na nale omukundu guuhupilo wawo yene. De Kerk ota ti egwedhelo lyopenzela yaakulupe oshi li ezimino lyepangelo kutya aakahele ohaya mona oshikwiila shi li pevi noonkondo, nolya hala okuhwepopaleka onkalo ndjika. Egwedhelo ndika etiyali kepangelo okuza muApilili 2004, sho openzela ya gwedhelwe okuza poodola N$250 tadhi ningi N$300. Pamutengenekwathaneko goshimaliwa, Epangelo otali ka longitha okapandi koomiliyuna 395 muule woomvula ndatu tadhi landula omolwegwedhelo lyoodola N$70 kopenzela yaakulupe.