Omupresidende A Kolekulula Evudhomo lyUulingilingi

0
17

WINDHOEK – Omupresidende Hifikepunye Pohamba okwa kolekulula eitulomo lye okuvudha mo uulingilingi moshilongo nota indile oshigwana ashihe shi kwathe molugodhi nduka. Shika okwe shi popi pethimbo ta egulula pambelewa Omutumba gOkugongala Omutitatu gOparliamende Ontine yaNamibia metiyali, oshituthi shoka sha kalwa kaakalelipo yiilongo yopondje naahiywa ya simana. “Iiwike iyali ya piti, onda egulula pambelewa Okomisi yOkukandeka Uulingilingi. Shika oshi li etokolo lyetu okuungaunga nokuvudha mo iilonga yomilema moshigwana shetu. Onda hala ishewe ndi indile oshigwana ashihe oshowo aatotiveta yetu ya gandje eyambidhidho lya shiga ko kOkomisi yi vule okugwanitha po oshilonga shayo nokwaadha omalalakano ngoka tse Aanamibia twe yi inekelela paveta. Otandi pandula aatotiveta yetu sho ya pititha oveta ndjika ya simana, ndjoka tayi ka kwatha mokuyambula po ewiliko lya ndjunguka, eitulomo miinakugwanithwa oshowo iilonga inayi futama moshilongo,” Omupresidende ta ti. Eshongo enene kAanamibia okumbalipaleka oonkambadhala dhawo okweendeleleka etulomiilonga lyomilanduveta nooproholama dhoka tadhi ka nenepeka iilonga yekoko lyemona nomapendulopo. Ngaashi ekandulopo lyonkalo yoluhepo, egandjo lyiiyakulitho nomayakulo koshigwana, etotepo lyoompito dhiilonga nosho tuu. Tatekulu Pohamba okwa ulike koontotwaveta odhindji dhoka dha pitithwa omvula ya zi ko, nodhindji dhomudho odha shainwa nale dhi ninge ooveta. “Etulomiilonga lyoompango dhika nali pondole sha komahumokomeho gemona nuuhupilo moshilongo shetu. Oshi li etegameno lyandje kutya Oveta yElundululo lyEvi lyOkomikunda otayi ka eta po elunduluko li wetike koonkambadhala dhetu dhi nasha nelundululo netopolo lyevi li thike pamwe. Oshilalakanenwa shetu sha simana okuvuta ooveta dhoka tadhi opalele onkalo yopethimbo ndika oshowo oompumbwe dhetu, oompango dhoka dha pumbiwa shili koshigwana shaNamibia. Ooveta dhika odhi na okulalakanena okuungaunga noompumbwe dhopamahupilo nonkalathano yoshigwana shetu,” omupresidende ta ti. Mwene gwOshilongo ota ti, pandjokonona yiigwana, Namibia okwa talika ko natango oshilongo oshigundjuka. “Paushili, tse otu li natango meipyakidhilo lyokuvuta ooveta nomauthoveta ngoka taga opalele okuwilika nokuutha omainyengo getu gopashigwana miimpungu moka ooveta tadhi opalele kape dhi po. Ishewe otatu toto po ooveta dhoka tadhi ulike ombepo yuudemokoli nokunkondopaleka omaukwatya noongushu dhuudemokoli wetu nomutungilo gwepangelo.