Iinima yAaniilonga Otayi Ka Kundanekwa Neitulomo

0
11

WINDHOEK – Iinima ya guma iilonga ngaashi omalongithonayi gaaniilonga, ekutomiilonga lyaanona oshowo oontamanana pokati kaaniilonga naahona yawo otayi ka kundanekwa neitulomo kiikundaneki moshilongo sha zi poshigongiilonga sha ningwa metitatu moshilandopangelo. Omutumba ngoka ogwa kalwa kaanambelewa yehangano lyopaigwana li nasha niinima yaaniilonga (International Labour Organisation, ILO), Uuministeli wIinima yAaniilonga, Ehangano lyAagandji-yiilonga moNamibia (Namibian Employers’ Federation, NEF) oshowo aakalelipo aakuluntu yiikundaneki moshilongo. Aakalelipo ayehe poshigongi shoka oye shi zimine kutya oshindji osha pumbwa okuningwa nelalakano okweeta po oompito dhomakwatathano opo iinima ya guma aaniilonga naahona yawo yi angaukiwe nayo nawa. Aakuthimbinga oye na eiyuvito kutya iikundaneki oyi na okukutha ombinga moondondo adhihe dha yama iinima ya guma iilonga, naashika andola shi kale hashi ningwa aluhe, ndele kashishi ashike paempito dhimwe. Oonkundathana dhoka odha landulwa koshigongiilonga shomasiku gaali metine notashi hulu nena, tashi ningilwa aatoolinkundana notashi tsu omuthindo iinima yayooloka ya nika ekundaneko lyiinima ya pamba iinima yaaniilonga. Osha ziminwa wo kutya iikundaneki yi kale oshitopolwa shetulomiilonga yOveta ompe yIinima yAaniilonga. Mokupopitha oohamushanga yiikundaneki yomoshilongo, Alphelus !Naruseb ngoka e li Ominista yIinima yAaniilonga nOnkalonawa yOshigwana okwa tsu omuthindo ompumbwe yekwatathano tali tungu. Paye, ekwatathano ewanawa otali lalakanene okupendula po etulomiilonga yOveta ompe yAaniilonga ndjoka kwa tegelelwa yi ye miilonga muJuli nuumvo. “Uuministeli wIinima yAaniilonga oshowo aalongelikumwe nawo pankalathano otaya ka lalakanena okulongela kumwe niikundaneki okutota po omukalo tagu opalele nogopantu gu nasha nekundaneko lyetulomiilonga yoveta yaaniilonga,” minista ta ti. “Omakwatathano gomiilonga oshimpungu shi ikalekelwa, nosha simana kemona oshowo ekoko lyombepo yopolitika moshilongo kehe. Nonando Uuministeli wIinima yAaniilonga owu na oshinakugwanithwa okutula miilonga nokushilipaleka elongitho lyOveta yAaniilonga, minista okwe shi zimine kutya uuministeli we itawu vulu okulonga muuwike, onkee iikundaneki nayi dhane onkandangala okukundaneka oshigwana kombinga yomalunduluko omape ngoka ga holoka po. Oonkambadhala dhika otadhi ka tya sha ketulomiilonga lyOveta ompe, minista ta ti. Okwa uvaneke okutala komikalo dhoka tadhi ka hwepopaleka ekwatathano lyawo niikundaneki. Amushanga omukuluntu mUuministeli mbuka, Ulitala Hivelua ota ti Oveta ompe yIinima yAaniilonga, oya eta po ompito yompangu yowina ya guma iinima yaaniilonga, notayi ka tulwa miilonga paendondo dhontumba omanga inayi tameka okuya miilonga meudhililo muJuli. Kepulo Davie Bosch okuza kOprojeka yIinima yIilonga nAanona moSouth Africa, okwa ti ethipombinzi nehepeko lyaanona ohali adhika wo miigwana mbyoka ya huma, hashi ningwa pamukalo guumbwanda neuliko lyomathano giisithahoni/iihulo. Bosch ota ti iinima yaaniilonga naanona ohayi gumu nayi onkalonawa yaanona oyendji muuyuni oshowo moNamibia. Konena, mboka ye nasha niinima ya guma aanona moNamibia oya totha mo omaludhi gayooloka giinima ya guma iilonga naanona, ngaashi aanona haya longithwa kaakuluntu okulonga iikulumuna nomiyonena ngaashi omateyo gomagumbo, uufuthi wiinima miihauto nokuyaka iimuna.

SHARE
Previous articleCycle Tour Turns 21
Next articleAvis Sluice Gates Open