MWANA musizana wa lilimo ze silezi ya simuluha kwa munzi wa Ruacana na kile a timela lifu leli maswe la matomolapilu biki ye felile kasamulaho wa kuhohiwa ki kwena mane ni kubulaiwa.

Simpangaliko nesi kile sa ezahalela kwa munzi wa Undoozu mwa silalanda sa Ruacana.
Mufu na kilwe a zibahazwa ka libizo la Unotjali Mbuale yana li mwa pabalelo ya malumahe wa sisali mwa nako ya sona simpangaliko sa matomolapilu se. Mufu nanza bapala ni balikani ba hae ba balalu ba lilimo zenee haa yo mun`wi kubona una ni lilimo ze ketalizoho.

Malumahe mufu yena nanza sweli kuno swala litapi mwanako simpangaliko si ezahala kono mwa nako yana kile a utwa muhuo wa banana na kile a matela kwateni kono na palezwi kutusa mwanahe. Na kile a biza mapokola kono ni bona neba palezwi kutusa mufu. Kakuya ka sibuabui wa mapokola, Lineekela Shikongo, mapokola ka swalisano ni tusano kuzwelela kwa limembala za lubasi, neba konile kufumana feela toho ya mufu kasamulaho wa musecho wa mazazi a mabeli.

“Toho ya mufu ne fumanwi ki bayahi ba naha Angola kwa buse bwa museto wani,” ne kubulezi limembala za lubasi lwa mufu. Limembala ze swana za lubasi neli konile kuzibahaza muhabo zona kuli kamaniti ki yena luli.
Shikongo sa kupile limembala kaufeela ze pila kwa mukulo wa nuka kuli lino tokomelanga ahulu ka nako kamukana haliya kwa kushuta kakuli likwena za sabisa luli.

“Lubasi lwa mufu selu pilile lilimo ze n`ata kwa mukulo wa nuka mi li swanela kuziba lika kaufeela ze ezahala kwa nuka ka nako kaufeela. Likwena kize n`ata mi mutu ni mutu ha swaneli kulumelela banana ba banyinyani kuli ba bapalele kwa nuka,” ne kubulezi Shikongo.