MUITUTI kwa sikolo sa Iipundi sekondali mwa sikiliti sa Oshikoto na kile a ‘sabisa’ bupilo bwahae mane ni bupilo bwa baituti baban`wi kubeya maticele muta a bonahala kwa sikolo ni ndalamiti ya mufuta wa M26 hand-grenade. Ndalamiti ki yen`wi ya lindalamiti zene eziwa mwa naha South Africa pili naha ye isi ka fumana kale tukuluho. Muituti u eza sitopa sa giledi 8 fa sikolo sani.

Lipiho ze zwelela mwa sikiliti sani li talusa kuli ndalamiti ne fumanwi mwa simu ya mauza.
Kakuya ka yo muuhulu wa sipokola mwa sikiliti sani, Commissioner Anne-Marie Nainda, ndalamiti ne fumanwi ki musali-muhulu mwa sikiliti sani mwa nako yana sweli kuno tahula mwa simu ya hae mabapa ni tolopo ya Omuthiya.

Ne ku-utwahezi kuli musali muhulu na kile a luma mwanana kuli a ise ndalamiti yani kwa mapokola kakuli yena musali muhulu nasa zibi nji ki ndalamiti kapa ki sika man`i luli. “Mushimani mane ni banana baban`wi neba bata kukwalula ka kwahelo ka ndalamiti kono ka litohonolo la Mulimu, kakwahelo neka sika kwaluha kapa neka kwaluhile kapa fa lu bulela zi sili. Ndalamiti ya mufuta o, ya sabisa maswe mi I kona kubulaya nihaike batu ba fitelela ba 20,” ne kubulezi Nainda.

Kakuya ka bayahi ba basepahala bene ba ikambotile ni luna ba mutende o, muituti kiwa lilimo ze 20 mi na kile a bonahala kwa sikolo ni yona ndalamiti yani mi kubulelela maticele ni baituti baban`wi kuli na tile ni ndalamiti kwa sikolo kono na lela kuli a I tambeke kwa mapokola mwa lihola za musihali sikolo hasi zwa.
Neku utwahezi hape kuli sibaka fo nakonile kusiya ndalamiti neli sibaka sene sili mabapa ni sikolo ni keleke mwa kena yena muituti.

“Na sika bulelela maticele hande ka lihola za kakusasa na siile feela ndalamiti yani fa silalanda sa sikolo. Nto yene lu konile feela ku-utwa neli mapokola bene ba tiile ni sin`wan`wa ni kubulelela batu kaufeela kuli lu kwalule likwalo za sikolo ni kuliba kwa mandu ni kubulelela bo lyaminzi kuli ba sike ba saba mwa nako ye swana hape,” ne kubulezi ticele yo mun`wi. Kakuya ka Nainda, kuna ni mifita futa ya lindalamiti ze sika sebeliswa kale mwa tolopo ya Omuthiya ni minzi yeli mabapa kakuli tolopo ya Omuthiya neli tolopo yene sebeliswangwa ahulu ka kuba nkambe ya masole mwanako yani naha ne lwanela tukuluho.

Nainda hape naize, ndalamiti yen`wi ya mufuta wa 6mm motar bomb ye eziwa mwa naha Russia ne fumanwi ni yona mwa minzi ye mabapa ni Omuthiya mwa kweli ya N`ulule silimo se sifelile.  Mifuta futa ya lindalamiti se konilwe kufumanwa mwa minzi ye mabapa ni Omuthiya mwa lilimo ze felile mi mapokola banze ba patehile ni musecho wa kufumana ona mifuta futa ye mi ba sweli kuno I bulaya.