WINDHOEK –Ngoka a li nale Ominista yElongo nakusa Dr. Abraham Iyambo – omunamimvo 52 ota ka pakwa papangelo momawendo gaPionierspark osho epangelo lya tseyitha metiyali. Pauyelele waAmushanga Omukuluntu mUuministeli wOmauyelele nOmakwatathano gOpautekenika, Mbeuta Ua-Ndjarakana epangelo olya tseyitha okugandja epako lyopapangelo okusimaneka nakusa minista Iyambo.

Ua-Ndjarakana okwa tseyitha dhika metiyali, sho kwa li a kuthile ko iikundaneki kombinga yomalongekidho ge nasha nepako lyanakusa ominista yelongo nale nakusa Abraham Iyambo. Amushanga  Omukuluntu ota ti osheendo shomuyalu omushona otashi ki idhenga ondjila okuya koLondon, meweliko lyOminista yAagundjuka, Iilonga yOpashigwana, Omaudhano nOmithigululwakalo, Jerry Ekandjo, Amushanga Omukuluntu mUuministeli wIikwapondje, Veikko Nghiwete oshowo aakwanezimo yanakusa minista. Osheendo shika otashi ka ya nondhila yomupresidende okuza pokapale koondhila kopaigwana kaHosea Kutako okuya koLondon noku ka tala ko omudhimba gwaIyambo. Osheendo okwa li sha tegelelwa okugalukila moNamibia ohela metine kongulohi nokunambela pokapale koondhila kaEros mOvenduka. “Molwaashoka otashi ka kala ethimbo lyuusiku sho osheendo tashi ka thika, oshigwana otashi indilwa opo kaa shi holoke pokapale koondhila kaEros.

Kakele aakwanezimo awike oshowo aanambelewa yontumba yepangelo oyo taya ka tegelela omudhimba pokapale kaEros,” osho amushanga omukuluntu ta yelitha.  Nena, metitano ongula, omudhimba okwa tegelelwa gu falwe koshigumbo she molukanda Hochland Park mOvenduka. Konima, omudhimba otagu ka falwa kOshikunino shOparliamende (Parliament Gardens) moka tamu ka ningilwa oshituthidhimbulutho shoka tashi ka tameka potundi ontiyali yomutenya nena metitano.  Omudhimba otagu lala moka sigo mOlyomakaya, naakwashigwana otaya vulu okumona ihe ompito okutala koshipala nokugandja esimaneko lyahugunina uusiku auhe sigo ongula sho taku ka ningwa epako lyaminista ngoka eso lye lya dhenga nayi pevi  nokuhalukitha oshigwana shaNamibia. “Ngele oshiketha shomudhimba osha egululwa, nena oshigwana otashi vulu okutala koshipala nokugandja esimaneko lyahugunina. Ihe ngele oshiketha osha siikilwa, itashi ti aagameni inaya hala aakwashigwana ya tale koshipala – ihe otashi vulika awike kutya ope na ombepo oyindji tayi pepe,” osho amushanga omukuluntu ta yelitha nokutseyithila oshigwana.

Natango Ua-Ndjarakana ota yelitha kutya iiyenditho kaakwashigwana otayi ka gandjwa kaakalimo yomOvenduka. Omahala mpoka tapu ka londekelwa aakwashigwana otaga ka tseyithilwa wo oshigwana. Megwedhelopo, ota ti shampa elilo lyoosa lyopashigwana lya tseyithwa, epandela lyoshilongo otali ka tsilikwa etata-kati muule wethimbo alihe lyelilo lyoosa. Nakusa Omundohotola Abraham Iyambo ota ka fumbikwa nenge ota ka pakwa momayendo gaPionierspark mOlyomakaya. Omumwayina gwanakusa Iyambo, Cecilia Ndishishi naye okwa li a pakwa nomayendo ngaka omvula ya zi ko.  Amushanga Omukuluntu okwa ekelehi omapopyo kombinga yeso lye moshikundaneki yesiku kutya ‘ope na oshinima inashi yela nawa’ nenge tashi holekwa shi nasha neso lyaIyambo, ta ti kutya kape na shoka tashi holekwa shi nasha neso lyominista yelongo. “Kape na shoka tashi holekwa mpaka nando. Netompelo sho inatu hala aantu ya pitikwe okuya kokapale koondhila kaEros, itatu kambadhala awike okuyanda omakuyunguto, oshoka oshigwana ashihe osha halukithwa keso lye,” osho ta yelitha.