Xoa-aos: Magreth Nunuhes

Tsoaxubams - ║An╪gāsaben DRC ╪naumâi ║an║guib, Tsoaxubams !nâ ║goeb din ge ra mî, ║în !âu hâsa in mû mîmâidi !ā!khōmais ge dī di nî dī׀oa׀oahesa, ׀nais ge kaise ╪gui mîmâide a dī, xawe noxopa dī׀oa׀oahe tama hâde  a xui-ao. Leticia Martins, ║îs tsîn a DRCs komitee ║anis ge ge mî, ­║îs di ╪âi╪hansens hânab ga nē ║an║guiba nî !ā!khōmais ╪gao׀khādi !oa dī-unuhes kara os !oabade mās marisa khuihe tidesa, nēpan !nāsa !gôab !nâ hâ ║an╪gāsabena a sîseno amaga.

“ ║În ge sida ╪oago kurib di ׀Khū║khâb !nâ ge mîmâiba mā-amsa da nî !khō!oa tsî omde omtsoatsoasa, xawen ­║îna nēsis kōse ra mā da !ereams ge, ║în noxopa !ereamsa ׀Ae║gamsa xu !âu hâsa,” tis ge ║îs ╪âi╪hansensa gere gowa╪ui.
Huri-ammi !ās nēs di !ā!khōmais ge ge ╪an╪an, ║îs ge DRC ║an║guiba ╪hanusise ╪gâxa-ūsa a !khō!gâ tsî ║nās !aroma N$2.8 miljunsa a ╪nûi╪ui !khaisa.

Nēs ge ║nāti ī ╪khîo!nâsiba ║gaus ׀nopa║nâs hîan ge nē ׀khom׀khomsa ║an║guib ║an╪gāsabena 20 Ao║khumu║khâb dis ai ūhâ is age sao. ║Nā ׀nn ge ║îna ╪khîo!nâsib xoakhâiba sī dana sîsen╪ui ra mâisab, Eckart Demasiusa gere ║khae║nâ-ai, ║gari║garisases !ā!khōmaisa nē ║an║guiba !ā!khōmais dise nî !gāra!āse.
║An╪gāsaben ge ūhâ i ╪khîo!nâsin di ׀nîn ge, ║gam-i tsî !nan׀gaiba ׀khais tsî ╪uruo!nâ mâsigu ║în ║an!nâ hâgu tsîna.
!Aru׀în gere !gaesens ge, nausas ge !ā!khōmaisa 25 ║gamamde a mâiba ni, xawedi !nanidi ׀guide ra sîsensa tsî ║aupexa 10 000 khoena nēpa ׀gui ║gam-e ra hōsa. ׀Nî ║an╪gāsabeb DRCs !nâ nēsi ║aupexa hû kuriga ║an hâb ge ge mî, !ā!khōmais ge a mîmâiba bi !khaisa “║gam-i tsî !nan׀gaiba ║îb oms kōse ׀nai ╪oago kurib !nâ nî ׀khī-ūba bise ge īsa” ­xaweb nēsis kōse noxopa !âu hâsa.

“║În ge ║naetisase mîmâide ra dī, xawe dī׀oa׀oas !nâ kaise a ╪au. Tita ge ī ra xū-e ta kara mû o ׀gui nî ╪gom,” tib ge ge mî. Lucia Immanuels ge ╪khari-omn !nubusiba gere !gae tsî ge mî, ║în !garob !nâ ╪hâsib ga hā o ra huisensa tsîs nēsa ╪uruo!nâ hammi tsî ׀aena ║an╪gāsaben !aroma !khō╪gā hâsa. “Omkhâisens ge !gôaxa ti ׀gui da ra mîmâibahe, xaweb !nōba ║goe. Omdi ge ra ╪huwi║nâ xas-i tsî ╪nuru║nuib hîa da ra sîsenūb xa !aromahe hâse,” tis ge ge mî.
Martini ge gem î, Tsoaxubams !Ā!khōmais ge mîmâiba nisa ║în di ╪âi╪hansendi ain 3 Tara║khumu║khâb dis ai nî oe-amsa, xawen ge ║an╪gāsabena nēsis kōse noxopa xū-i tsîna ║nâu tama hâ.