MAPOKOLA kwa Kahenge mwa sikiliti sa Kavango neba tamile mwana musizana wa lilimo ze 14 kubeya bo mahe kasamulaho babeli ba akalezwa kuli neba konile kupumbeka mbututu ‘mwalapa’ I mano yumbiwa ki musizana.
Musizana u kena mwa giledi 9 fa sikolo sa Yinsu Combined libima ze 150 wiko wa tolopo ya Rundu.

Kuakalezwa kuli musizana nasa itwezi likwezi ze silezi mi na yumbile mulwalo wa hae kwa mafelo a kweli ya Muyana. Seku utwahezi kuli musizana na filwe mba yani ki mushimani ya kena ni yena fa sikolo sesi swana.
Mahe musizana na tamilwe kakuli neku utwahezi kuli ki yena yana fapelelize mwanahae kuli a kone kunwa mulyani wa kuyumba mulwao ono konilwe kufumanwa kwa mibisi ya sikota sesi zibahala mwa Kavango kuli ki ‘ndimbwilisa’ mi mibisi ye, I utwahala kuli I tiile ahulu ha kuamanwa ni kuyumbiwa kapa mane kusulula mba.

Mwa nako yana kilwe a buzakiwa ki mapokola, mahe musizana naize na tabela kuli mwanahae a kone kufeza hande sikolo isi kuli a ine mwa hae ni kuanyisa mbututu wa hae ki kafo hana kile a mufapeleza kuli a nwe mulyani wani.
Mwa nako yeo ba mutayi wa makande wa Nampa ba potela ‘libita’ la mbututu, ‘libita’ neli apesizwe ki miutwa ni macacani ka mulelo wa kuleleka mane ni kuhanisa linja kuli li sike za kona kuyepa fateni.

Kakuya ka Leo Namwere, ticele kwasikolo sani sa Yinsu Combined yana konile kulumela zebe mapokola kuamana ni simpangaliko sani kaufeela, musebezi ono petilwe ki musizana ni mahe nesi musebezi o munde mi ki bubangoki kikafo hana boni feela kuli a bihele mapokola.
Babeli bata bonahala mwa khuta ya Muatuli la bulalu biki ye.
Kakuya ka ticele yo mun`wi wa litaba za lifasi fa sikolo sesi swana, mutompehi Paulus Mbangu, yena nasa zibi kaza mulwalo wa musizana mi na konile feela kuituta kaza mulwalo wani mwa mazazi a cwale a felile muta sikolo hane si inzi mwa tabo ni nyakalao ya mukiti wa sona.

Mbangu naize mulelo wana ezize musizana wa kuyumba mulwalo nesi mulelo o munde kakuli Likolo li lumelela baituti kukena sikolo inge ba itwezi mane haisi nako yeo kusiyala feela libiki ze nee kuli mutu kapa mane yena muituti kuli a kone kupuluha.
Mbangu na sika tabiswa ki simpangaliko kaufeela mi yena ka kuba ticele wa litaba za lifasi na kile a bilaela maswe ka kutiiseza kuli baituti kwa sikolo sa habo neba kilwe ba talusezwa kaza mulao wa Likolo wa kulumelela baituti kukena sikolo mane haisi ha kusiyalela libiki ze nee kuli muituti ya cwalo a kono kutuseha.

Mbangu ni la kacenu le, usa palelwa kuutwisisa kuli kanti hee musizana na kile a yumbela n`i mulwalo wa hae haiba lika ze cwalo ki lika zene konilwe kutalusezwa baituti kaufeela ki maofisa bene ba zwelela kwa Likolo la Makete silimo se.
Kakuya ka Mbangu, muituti uta eleziwa hande-nde mwa mazazi a taha hata kona kukutela kwa sikolo ili kuli a kone kuitukiseza hande-nde lituto za sikolo sa hae.