WINDHOEK – Omuprimaminista Nahas Angula metitatu lyoshiwike sha zi ko okwa indile oothigwa naanona ya pumbwa ekwatho moshitopolwa shaGrootfontein yi ilonge nuudhiginini ya vule okupondola sha moonkalamwenyo dhawo nelalakano okuyanda onkalo yoluhepo.
Omuprimaminista okwa li a yamukula komapulo goothigwa naanona ya pumbwa ekwatho ye li 40 lwaampoka mboka kwa li ya talele po ombelewa ye meyambidhidho lyEhangano lyOmushigakano Omutiligane moNamibia (Namibia Red Cross Society –NRCS), mboka kwa li ya pula kutya omolwashike aakwashigwana yamwe moNamibia ye li aathigona unene omanga yakwawo ye li aayamba.  “Ngele omwa hala okuyanda onkalo yoluhepo, omu na okudhiginina iilongwa yeni yosikola. Ngele omwa thigi po osikola nena omwa thinda konkalo yoluhepo, ilongeni mwa mana mo nokuninga aaprofessa,” osho omuprimaminista e ya kumike.
Okwa li wo a dhimbulukitha oothigwa naanona ya pumbwa ekwatho mpoka kutya ope na aanona oyendji omayovi moosikola moNamibia mboka ayehe taya kondjo okusindana moonkalamwenyo dhawo, nokwe ya indile ya longe neitulomo ngele oya hala okuthigathana po naanona mboka ooyakwawo. Oothigwa naanona ya pumbwa ekwatho okwa li wo ya popi nOmuprimimanista kombinga yesimano lyomahogololo oshowo nkene omuntu ta vulu okuninga omunapolotika.  
Omuprimaminista okwa li e ya tseyithile kombinga yomutungilo gwEpangelo lyaNamibia, iilonga yOparliamende, oshowo iinakugwanithwapo ye mwene.  Omunambelewa gOmakwatathano nOshigwana mEhangano lyOmushigakano Omutiligane moNamibia, Saara Iipinge okwa tseyithile oshikundaneki Nampa mEtitatu kombinga yelalakano lyetalelopo lyolweendo ndoka lyomasiku gatatu lu nasha nelongo kutya okugandja ompito kaanona ya vule okutalela po omahala gayooloka ngaashi Oshiputudhilo shElongo lyOpombanda moNamibia – University of Namibia (Unam) omolwomauyelele ge nahsa nomaithano oshowo Ombelewa yOmuprimaminista moka taya vulu okwiilonga sha nenge okwiilonga sha kombinga yEkotampango lyaNamibia.  
“Oshi li ompito moka Omushigakano Omuthiligane tagu gandja oompito kaanona okutala omahala giiputudhilo yelongo gayooloka oshowo omahala gopandjokonona ngaashi Heroes’ Acre, omahala giipungulwanima yopandjokonona (museums) nosho tuu.