RUNDU – Democratic Turnhalle Alliance (DTA) otayi gandja ombedhi kOngundu yoSwapo sho ya gandja edhina lyokandidate yawo yi thikame mehogololo lya gwedhwa po moshitopolwahogololo Sibbinda moCaprivi,  ndyoka kwa thanekwa li ka kale ko momasiku 14 Septemba 2012.

“Shoka twa tseya osho awike shoka kutya okandidate yoSwapo Chunga Ignatius Chunga oku li natango oshilyo yongundu yoDTA, oshoka tse inatu mu pa natango ombapila yeikuthomo lyuukwashilyo wongundu – onkee tse otwe mu tala ko awike kutya ye oku li natango oshilyo,” osho omuunganeki  goDTA gopashitopolwa shaKavango, Vincent Kanyetu ta ti. Kanyetu okwa li a holola omauyelele ngoka pethimbo lyoonkundathana dhi ikalekelwa noNew Era mOmaandaha.  Ekwatathano lyopapolotika lyaChunga noDTA okwa li lya hulu po momumvo 1998 konima sho a ndjoina oSwapo. 

“Tse katu na omikanda dhasha nenge omauyelele taga ulike kutya Chunga okwa thiga po ongundu pambelewa,” osho Kanyetu ta ti. Kanyetu ngoka e na etimwaumbwile okwa kundaneke oNew Era kutya eholokepo lyoDTA otali monika natango moSibbinda, ta gwedha po kutya ongundu yawo kayi li mo ashike osima yowala ihe oyi na omalalakano. 

“Shoka nda koneke osho shoka kutya aakondjithi yetu oya mana po omikalo dhootakatika dhawo adhihe. Tse otatu ka wilikwa kiikundathanwa yongundu yetu okushilipaleka kutya otwa sindana. Omwedhi tagu ya (Septemba)otatu ke mu hiya keyotho lyonyama li nasha nesindano,” osho Kanyetu ta ti. “Okandidate yetu  oyi li omukondjithi omunene noonkondo, oshoka oku li omuviyauki gomoshigwana ngoka e na omaukwatya omawanawa,” osho omuunganeki gopashitopolwa ta ti. Oshilyo shimwe shomewilikongundu lyopashitopolwa, ngoka wo e li okandiate yoDTA, Alexius Mibonda oku li wo omukuluntusikola poSikaunga Combined School moshikandjohogololo Sibbinda. “Aakwashigwana naya hogolole DTA shi nasha nuuhupilo wawo, oshoka ongundu ndjika oyi li eyamukulo komikundu dhawo.” 

Pokati mpoka,  Chunga Ignatius Chunga okwa ekelehi omapopyo nokwa uvaneke kutya ye ota kala oshilyo shoSwapo sigo aluhe. “Okuza ashike sho nda thigi po oDTA momumvo 1998, ngame inandi gongala nando miishigongi nayo. Naya hulithe po okutota oohapu nokupopya kutya ngame ondi li oshilyo shongundu yawo,” osho Chunga ngoka ta monika a geya ta ti. Chunga oku na eineekelo kutya ongundu tayi pangele otayi ka sindana. Tse otatu ka sindana lela, oshoka eyamukulo lyoshigwana enene lela noonkondo. Oongundu adhihe ne (4) dhoka tadhi ka kutha ombinga momahogololo odha ulike aaulikwahogololwa yadho momahogololo ngoka ga silwa enota omwedhi tagu ya, ano momasiku 14 Septemba 2012.

Aaulikwahogololwa oyo nee ngaashi Chunga Ignatius Chunga (Swapo Pary), Alexius  Sombelo Mibonda (DTA), Alfred Namayabona Chilinda (CoD), naAssens Sibuku Malumbano (RDP). Okandidate ndjoka tayi ka sindana otayi ka pingena po kansela goSwapo Party, Felix Mukupi ngoka kwa li a mana oondjenda dhe moshiponga shohauto kuyele muJuni nuumvo , sho ohauto ye kwa li yi idhenge momuti. Sha landula esiku lyaMukupi momasiku 16 Juni, Okomisi yIilonga yOmahogololo moNamibia (Electoral Commission of Namibia – ECN) oya kala nokulonga nomazigudhe opo yi longekidhe omahogololo ngaashi tashi uthwa koveta yomahogololo ndjoka tayi ti kutya ngele opwa holoka ompito (omwaka) ogu na okuudhithwa muule womasiku 90 nenge oomwedhi ndatu.