MULILO o akalezwa kuli neu tisizwe ki kandela neu kile wa cisa ndu ya yo muhulu wa hositelu kwa sikolo sa Ribebe sekondali kwa munzi wa Ncaute mwa sikiliti sa Kavango libima ze 60 mbowela wa tolopo ya Rundu. Mulilo hape neu bulaile banana babeli. Yo muhulu wa hositelu ya sikolo kwa munzi wani, mutompehi Joseph Gideon kubeya musalahae ni banana baban`wi neba konile kubanduka ka kumatela fande.

Mwana nako yeo luna ba New Era lu potela munzi wani la bunee biki ye felile, nelu fumani feela litupu za banana kubeya ndu yene ciile habutuku.

Banana bene ba shwezi mwa mulilo neba kilwe ba zibahazwa ka mabizo a cwale ka: Annastacia Nangura Haindere wa lilimo ze 15 kubeya Muronga Haindere wa lilimo ze 12. Banana neba simuluha kwa lubasi lwa musala Gideon mi mulilo neu kile wa tatekela mwa ndandulumu ya bona.

Mwanako batimisi ba mulilo bato esha kwa munzi wani kuli bato tusa, neba tilo fumana kuli banana nese ba timezi kale.
Baituti kubeya maticele neba likile ahulu katata kuli ba kone kutimisa mulilo ka kusebelisa mezi mwa mahemele hane nze ba litezi batimisi ba mulilo kono ne kupalile.

Luna ba New Era nelu kile lwa saba ahulu hape muta lu ituta kuli sikolo se sinca sesi sika kwalulwa kale simubuso, hasina litimiso za mulilo mwahala sona ili nto yene tisize kuli mane batimisi ba mulilo ba kone kupalelwa kutimisa mulilo hande mwa nako yeo mezi ane ba sebelisa a feela.

Muzamaisi wa sikolo ni yena na siezi a sina mati mwa hanu baken`i sa sona simpangaliko se.
“Simpangaliko se, si ezahala mwa nako yeo banana banze ba patehile ni litatubo za bona za fahala silimo, kona kuli halu zibi hande mane ni sa kueza cwale. Ki simpangaliko sesi maswe sa matomolapilu ahulu,” ne kubulezi muzamaisi wa sikolo Pontianus Musore.

Kakuya ka Musore, muituti yo mun`wi ili yena yo muhulu na eza sitopa sa giledi 8. Sikolo si lelezwi kuli si konwe kukwalulwa simubuso mwa kweli ya Muimunene mi sina ni palo ya baituti ba 254 babapila mwa hositelu ya sona.