NAHA Namibia hape, se patalizwe ka libizo leli maswe la bukebenga mwa mazazi a felile. Mwa nako ya cwale, muuna na bulaile musali ka sabule mi simpangaliko sa matomolapilu se, nesi kile sa ezahala kwa Epako mwa tolopo ya Gobabis mwa sikiliti sa Omaheke.

Yo muhulu wa sipokola mwa sikiliti sa Omaheke, Commissioner Josephat Abel naize ha sika ziba litaba kaufeela ka butungi, ka kutiiseza kuli ha zibi hande kuli sene si tisize kuli mane muuna a eze kezo ye cwalo ki sika man`i kono lipatisiso lisa zwelapili.
Kono ze ni halilicwana, bapila mabapa neba kile ba bulela kuli neba kile ba utwa babeli inge ba hanyeza busihu kaufeela, mi kakusasa neba sika bona mutu yana kile a zuha kuzwela fande ili nto yene tisize kuli mane ba bize mapokola.

Mapokola neba konile kuloba sikwalo ni kufumana situpu sa musali wa lilimo ze 32 inge si apesizwe mwa situngu sani.
Libizo la musali hali sika patalazwa kale kakuli lubasi lwa hae halu sika talusezwa kale ni lona. Muuna na konile kubalehela kwa mulenen`i wa Windhoek ni kukiyela situpu mwa situngu. Nihaike na konile kubaleha cwalo, na konilwe kuswaliwa mi na kile a bonahala mwa Khuta ya Muatuli mwa tolopo ya Gobabis biki ye felile la bubeli.

Mwa lipiho zen`wi za bubangoki, muuna wa lilimo ze 21 na konilwe kubulaiwa a mano tabiwa ni sisebeliso sesi shengile inge tiipa. Simpangaliko nesi kile sa ezahalela kwa sibaka sa naikahela sa Nau-Aib kwa Oshetu Number One mwa tolopo ya Okahandja.
Mufu na kilwe a zibahazwa ka libizo la Abnel Taapopi Angula Jesaya mi yana kile a mutaba ka sona si sebeliso sani na tamilwe ni yena.