LIKOLO kamukana za naha ye, ze wela mwa ketelelo ya Muso halina kulifisa bana ba sikolo tifo ya sikolo mwa bukamuso sihulu kwa banana baba sika fita kale kwa sekondali baba tateka ni sitopa sa pili kuisa kwa litopa zen`wi.

Manzwi a, na patalalizwe ki Likwambuyu wa Likolo la Tuto, Dr Abraham Iyambo mwa tolopo ya Walvis Bay biki ye felile. Mwa nako ya cwale, bashemi ba lifelanga bana ba bona tifo ya sikolo konji haiba bashemi baba cwalo habana mali a cwalo mi, haiba inge ba fumanwa kuli habana mashelen`I a cwalo, ba kupiwanga kuli ba kupe tuso ye cwalo kwa Likolo la Tuto ili kuli mwana kapa mane bana ba bona, ba konwe kulifelwa kwa sikolo ki Muso ka Likolo la Tuto.

Likolo la Tuto li lela kutusa banana baba simuluha kwa mabasi a shebile ahulu ili mabasi a palelwanga kulifela bana ba bona litifo ze cwale kaze.

Mwanako ya cwale, Likolo la Tuto seli beile kwa tuso musulo wa mashelen`i o likana N$100 million ili musulo o swanela kutusa banana baba ipumana mwa likayamana leli swana sina le. Kuyona pene ye, pene ye likana N$50 million se beyezwi kwa tuko kuli I konwe kusebeliswa silimo se.

Hana patalaza kaze kaufeela, Likwambuyu nali kwa mukopano ono boni makilasi a lobapeli (8) inge a kwalulwa simubuso kwa sikolo sa !Nara Primary mwa sikiliti sa Erongo sani. Makilasi na konilwe kuyahiwa ka pene ye likana N$1 million ka tuso ya neulo ya mashelen`I ana  neuzwi ki kampani ya Merlus and Hatutunga Fishing.

Iyambo hape na kile a kupa maluko a shelana kubona kuli a peta musebezi wa ona ka kusebelisa mashelen`i a filwe kubona mwa nzila ye swanela.

“Tuto ki liseli mi lu kona kutusa bayahi ba naha ye baba shebile ni kubafa sibaka ili kuli bana ba bona ba kone kuba tusa mwa bukamuso mi Likolo leni etelezi le, lita bona kuli lu tusa batu baba cwalo ka nako kaufeela,” na tiiselize.

Ba katengo ka Namibia National Students Oraganisation (Nanso), ni bona neba kile ba tabiswa ki patalazo yani kuzwelela ku Likwambuyu ka kutiiseza kuli ki mulelo o munde ota tusa naha kaufeela.

Hala bulela kwa mupokola o swana mutompehi George Kambala mubakweli ku muina situlo wa katengo ka Nanso mwa sikiliti sa Khomas naize, mulelo wani ki o munde kakuli ki mulelo ono litezwi ka nako ye telelle ili kuli mane u konwe kuhatiswa sihulu kwa banana ba mwa litopa ze nyinyani. Kambala hape naize Muso u tokwa tuso kwa maneku kamukana sihulu makampani a kwa mukunda.

“Tuso yene ezizwe ki makampani kwa Erongo ki tuso yende mi hape ki tuso yelu tabela kubona inge I eziwa ki makampani a man`wi mwa naha kaufeela,” na tiiselize.

Mwa musulo wa naha wa silimo se, Likolo la Tuto neli konile kuamuhela musulo wa mashelen`i o likana N$9,4 billion ha kubapanywa ni N$8,6 billion ya silimo se sifelile. Mwa silimo sesi taha, kuna ni mabulatwi a kuli Likolo la Tuto hape lita amuhela pene ye likana N$9,8 billion ili kekezo ye likana lipesenti ze 23,6.

Likolo la Tuto ki leli amuhelanga musulo wa mashelen`i o pahami ni kufita mi kutaluswa kuli mwa lilimo ze talu ze taha, Likolo lita kona kuamuhela musulo o pahami sina cwalo hape ni kufita.