WINDHOEK -  Okampani yomoshilongo yedhina Namusa Holdings (Pty) Ltd, oya ulike eitulomo okulanda po oofambulika dhokuhondja oonguwo dhoka itadhi longo pethimbo ndika (Ramatex Textiles) mOvenduka, dhoka epato lyadho kwa li lya etitha ekanitho enene lyoompito dhiilonga kaantu ye li 7 000, mboka oyendji yomuyo ye li aakiintu. Epato lyoRamatex  muMaalitsa 6, 2008, ofambulika yokuhondja iikutu mOvenduka okwa li lya etitha omaipulo omanene gomapunglo moNamibia. 

Aalandi aape yoRamatex nayo oya hala okutameka nongeshefa yokulonga iikutu, shoka tashi ka etitha po oompito dhiilonga kaantu ye li 20 000. Namusa okwa ulike kutya oya hala okulanda po evi nokuninga omawapekululo gomatungo goRamatex, noya hala okufuta Elelo lyOshilandopangelo okapandi koomiliyuna omathele gaali (N$200 million) shi nasha nevi oshowo N$178 million dhi nasha nokweetitha po omawapekululo mehala ndika.  

Okampani oya hala oshimaliwa shoka tayi gandja shi kwatele mo evi/ehala alihe moka muna omatungo ngaashi oRamatex, Flamingo, Rhino oshowo Taiwah mwa kwatelwa iiyakulitho ayihe. Kakele, omatungo goRhino noTaiwah inaga kwatelwa mo melanditho ndika molwaashoka omatungo ngoka kage li oshitopolwa shomatsokumweuvathano gokuthetha moka ompangu yi mo olunyala noge li gElelo  lyOndoolopa. 

Ompangu yOpombanda okwa li ya gandja epangulo li li muuwanawa wOshilando shaVenduka moshipotha pokati kOshilando naatonateli yoRamatex (liquidators). Shi nasha nosheetwapo shoNamusa okulanda po evi, okampani oya tseyithilwa kutya otaku ka talwa kongushu yevi paipindi uuna taku landithwa po evi, oshowo kutya Oshilando otashi ka gandja ongushu yevi  ndyoka lya halika. Namusa okwe shi koleke kutya oya hala okukundathana ngele ongushu oyi li pombanda unene shi vulithe shoka ya hala okufuta, shampa ashike taya vulu wo okukoleka ongushu ndjoka.   

Molwaashoka omatungo goRamatex kage na oopulana dhomatungo dha ziminwa, Oshilandopangelo otashi ka thiminikwa okulanditha po omatungo “kungoka e na oshimaliwa oshindji.” Pauyelele wOmunambelewa Omukuluntu gOshilando shaVenduka, Niilo Taapopi,  Oshilando osha li momathiminiko lela  okuza kepangelo lyopokati “kutya oRamatex otayi ka gandja oompito dhiilonga.”

“Onkee okwa li sha talika ko oshinima shomeendelelo, onkee Oshilando kasha li sha pewa ompito opo oopulana dhomatungo dhi ziminwe,” osho eyamukulo lya zi kuTaapopi sho a pulwa kookansela yompilameno kutya omolwashike oopulana dhomatungo inadhi ziminwa dhi nasha nomatungo. Pauyelele wOshilando, etulomiilonga lyomilandu dhi nasha nomatungo dhi li ompinge noRamatex, odha kala dhimwe dhomomikundu pokati kayo nokampani.

Oshikumungu inashi monenwa eyamukulo, molwaashoka Oshilandopangelo okwa li sha tindilwa okuya mehala/evi oshowo omatungo kooyene yoRamatex.