NAHA ye, I lela kulilimanisa butuku bwa taku ni mulomo mane ni butuku bwa maswafu hala likomu mwa silimo sale sa 2014 sihulu kwa balimi baba fumaneha mwa mutulo wa naha.

Ba Likolo la Njimo ka swalisano ni tutengo twa kwa mukunda kiba ba patehile ni ona mulelo o.

“Haiba lika kaufeela inge li zamaya hande, lu tabela kubona balimi mwa libaka ze inge bai kola kakuli bata kona kulekisa ni bona fa misika ye mituna sina kamo balimi baban`wi mwa mbowela wa naha banze ba sweli kuno ezeza,” ne kubulezi Likwambuyu wa Likolo la Njimo, mutompehi John Mutorwa.

Kakuya ka Mutorwa, ye ki zwelopili ye lateha yeta kona kutusa balimi mwa maneku kaufeela a naha.
Ba naha United States of America ka Millennium Challenge Account – Namibia (MCA) ka swalisano niba Likolo la Njimo, kiba bata neula pene yeta tusa kuona mungendenge o ni kutisa kuli mane butuku bwa taku ni mulomo bu konwe kulilimaniswa.

“Ka tuso ya MCA-Namibia, selu konile kun`ola palo ye pahami ya likomu ze swanela kutalimiwa sihulu mwa libaka ze taselizwe ahulu mwa mutulo wa n aha,” ne kubulezi Likwambuyu.
Muso ka tuso ya Likolo la Njimo, unze u sweli kuno yaha miyaho yeta kona kutusa mwa kulwanisa ni kulilimanisa bona butuku bo mwa maneku kamukana a naha sihulu kwa miseto ya naha.

Bun`ata bwa linaha za lifasi le la Africa li taluswa kuli li palelwa kuikola litekisano hande baken`i sa bona butuku bo bwa taku ni mulomo.

Naha ye ni linaha zen`wi, kize taluswa kuli kize sweli kuno ikola litekisano ze mwa libaka ze sina matata ni butuku bwa taku ni mulomo.

Han`ata, likomu ni linali kize yambalakisanga ahulu bona butuku bo.
Butuku bwa taku ni mulomo bu eshanga ahulu mwa sikiliti sa Caprivi ka mita kakuli ki sikiliti sesi ipa museto ni linaha ze cwale ka Botswana, Angola ni Zambia ili linaha ze tumile ahulu ni zona mwa pukelezo ya lifolofolo ze cwale ka linali hala zen`wi.