RUNDU-Mukuronasure gwanare gosure zaNoordgress zakara modoropa zaRundu ogu vagazarrere asi kuna kwatere munona gosure kononkondo akare kumwe nage panyama, nkera kakere nye mugara ana kugenda pwahana unzone,poopo Magastrata gwaRundu kamumangwilire asi kapi gazona.Gervasius Sheende gonomvhura 34,ogu vana kugazarera asi age kwatameka kukara panyama nomukadona ogu, age mukadona simpe nomvhura 15,kwamutamba asi age kwamukwatera kononkondo momuvho 2009.Kuna kumoneka asi apa gagwene ezimo olyo age nomvhura 16. Murongwa ogo gwanare kwamona munona gomukadona,ano ekona kono eli varugene kuna kulikida asi mukurona sure Sheende yige guhye munona ogu.

Sheende kavamugwene asi kwato epuko komakuye nagenye aga vamugazarera nkera,morwa posiruwo oso nye vakere kumwe nomukadona ogo,age nare nomvhura 16.Ana tundu monomvhura dekeverero lyoveta zokukeverera vanona,kukwama omu yakara mediveta kukwamanye mupanguli gepangero William Kasitoma.Komeho vakasike ketokoro lyangoso,mpanguro kazipurakenene kovagavi umbangi vavali vepangero, ntani kavapurakenene nye umbangi una kutunda kozina munona (Edina lyawo hawe nalyo tuna kara )ogu katente asi kwakere tagazara asi munendi kuvhura akare nomarutu gavali mokwedi kwaKudumogona 2009.Zina munona apa gapulire munendi asi ngapi kapisi nomarutugavali munona pomuhowo kwapatanene. Nye konyima tayapura nokutumbura murongwa mukwawo gomontambondunge 11, asi yige ana musumbapeke.Ano konyima nye zokumupuragera hawe tayaderemo asi mukurona sure gwawo yige ana musumbapeke.Nokutumbura asi Sheende yige ana sumbapekenge.Ano zina munona yipo nye vatokwere kukazegurura asi Sheende vahepa kumukwata vaporosi.Kukwama nye koyo yahorokere yitwaredere kegazarero,Sheende kwafungwinine  munona ogo nokumuhundira asi vahepa kulimona.

Apa nye valigwene ngoso hawe awo tavatwikire koLodge zakara morukanda rwaKehemu,omu nye vakalimwene velike monzugo.Sheende asi ngano makura yipo gahundilire munona ogo asi ngano alihuture mwene.Ano munona kuna kutanta asi pomuhowo kwanyokere kulihutura,ano konyima nage munona yipo nye garugene oyo gamutanterere.Munona katente asi konyima nye apa vamene kukara kumwe  Sheende makura tamupeke N$100.00 nokumutantera asi gaha tanterako muntu nkenye kweyi yina horoka kolodge.Mukadonagona ogo yiyo katanterere mpanguro asi hawe age kapi ana kara neyi yokuuyunga morwa nayinye eyi kwahorokere monzugo vanalipaterere.Mupanguli gwaRundu,Kasitoma konyima apa nye kapurakenene kwanavenye vakarelipo vepangero ntani nogu nye vanakugazarera yipo katokwere asi hawe pwato Yuma apa morwa apa varugene Yuma oyo munona ogo age nomvhura 16, ana pitakana edi dakara mediveta dekeverero.Age kaligwire nomukarelipo gomugazarerwa asi ekaro kumwe panyama eli kapi lina klara asi kwamukwatera kononkondo.

Nokutanta asi ozina womunona ntani muporosi ogu kakarerepo epangero Naftali Haipara,kapi vakerepo apa yahorokere omu vantu ava vavali vakere kumwe panyama.Ano magano nye aga vana kuruganesa kuna kara tupu magano gokutunda mogu yahorokerere.Kasitoma katente asi age kapi yina kumutetura asi ekaro kumwe panyama eli nampo kwakere momudona,morwa nampili vava vana kugava umbangi kapi vakerepo opo yahorokerere.Morwa noonday nye odo,mugazarerwa kapi vana kumumona asi muzoni kukwama veta ezi zakarapo zokuhamena ekwatero konkondo. Sheende yimaliva yendi eyio gafutire atunde modorongo tavayimutengwidire.Age kakamukarerepo Amupanda Kamanja, gokomberewa zaSisa Namandje Leagal Practitioners.