Sîsenao-i xa xoahe hâ

Nē kurib ׀Khū║khâb di 27sa xu 28 kōse gu ge Albertus !Aochamub, NBCs Direkter Generali (DG), Dr Audrin Matheb, NBCs Danab ╪Hôan tsî Proxramgu dib tsî Aldred Dreyeri, NBCs  Danab Texnoloxib !âb dib hâga NBCs di !Ah ╪Hôa╪gares !khaib, Tsumkwes ai mâba ge sari hâ i.

Nē saris di !aromas ge, NBCs ║îs di hâs nē ׀kharib !nâsa ║awo║awo tsî ║îs sîsenaon ║nāpa hâna ╪khâ!nâsa nî mās ai ge !gao!gaosa i. Nē !nubu saris !nâ gu ge Direkter Generali tsî ­║îb kurisakha tsîna sîsenaon ׀kha ׀hao tsî ║îna harasen ║în ╪hâsin, !nubusin, ׀gaisa !gomsin hîan ╪nôa-ūn xa ║îgu ׀kha nî ׀goragus !ēsa ge mā.    

!Ah ╪Hôa╪gares ╪hôa╪ui-aon, Dorothea Jonas, Katrina Cwis tsî Erastus Heinrich hân ge ║nā !ēsa sîsenū tsî Direkter Generala ge mîba, ║în ׀Ae║gams !nâ sī ║în ║khā║khākhâisa ra hō ╪gao !khaisa. !Aochamub ge !gao!gâxaseb ge nē khoen ║khoreba a ║nâutoas khao!gâ, ║­îb kurisakha ׀kha ׀Ae║gams !nâ gu ge oa׀khītoas khao!gâ nē ╪gans ai ╪âisa ge ╪nûitsoatsoa. Nē saris ge !gâi!gâna ge !ora, ║nāpan ge nē !nona ╪hôa╪ui-aon, Dorothea Jonas, Katrina Cwis tsî Erastus Heinrich hâna ╪oago wekheb ai ║în di 2 wekhekha nî !khō╪gā ║khā║khākhâisa ׀Ae║gams !nâ ║hao!nâtsoatsoase.

“Tita ra ╪âis !oagub ge nē ׀gaub !kharaga ╪hôa╪ui!khaigu di ╪hôa╪ui-aoda nē-e nau-e xu nî ║khā║khāsens diba a !gâi,” tis ge 26 kurixa Jonasa ge mî. “Sida nē ║aeb kōse Tsumkwes !nâ ra dī xūn ge noxopa ׀oro ║aeb !nâ hâ. Sida kurisan ׀Ae║gams !nâ ra dī xūn ge hoaragase ais ai hâ tsîs ge nē !ēsa sida !aroma kaise a ׀ō-aisa ­║îna xu da ׀asa ׀gauga mû║nâ tsî ׀asase oasīs khao!gâ nî tsoatsoase.”

Jonas ge ­║îs hoan xa ╪gurose ge !Ah ╪Hôa╪gares tawa a sîsentsoatsoa ╪hôa╪ui-aosa. ║Îs ge nē ╪hôa╪ui!khaiba 2003║î kuri ge tsoatsoa tsîs ge ║nā-amaga NBCs ╪hôa╪uis di !huis !nâ !â-e ra ׀huru. Jonas ge nē ║khā­khākhâis ║aeb !nâ Otjiherero ╪Hôa╪gare !Oabas kurisan âs ׀kha ra sîsen║are. ║Îs ge ׀nai musik-i proxrammi tsîna ge dītsâ tsî kaise ╪nīsase ra tsâ. Nē ׀gam wekhekha ׀ams ai!âs ge ­║îsa kurisan xa ra ╪gao╪gao!nâhe, ╪hôan tsîna khomaisa. Jonas ge !gôahesab Kaputub, Otjiherero !Oabas Danab  dib xas tsînas ╪û╪ûxa hui!nâde, ╪hôa╪uis !harib ai ra māhe !khaisa mî tsî koasa ║îb tsîna ra mā. Heinrichi ge nausab ║îb tsîna ╪hôa╪gares ╪hôa╪ui-ao, xawe nē ║khā║khākhâis !aroma ╪Hôan tsî Proxramgu !âb Departements tawa hâ. ║Îb di ║khoreb ge ╪hôa╪uis ׀khāba xub ga ׀guitsē !khō║nâs !âba a ║haosa. “Tita ge kaise !gâi!gâse ra !gawa׀îsen, !Ah ╪Hôa╪garesa sîsenbasa, xawe ta ge !nāsase !gâise nî tsâ !khō­║nâs !âba ║haosa. ╪Hôa╪gares sîsen-i ge tita !nâ a ׀khai, ti ׀aob !nâ !khoe tama hâ. Nau ׀khāb ai ta ra ╪goms ge !khō║nâs ti ׀aoba ra ׀gû kaisa,” tib ge Heinricha ra mî. Nē 24 kurixab ge DGba ge mîba, mâpab ║îb ║khoreba ║goesa tsîb ge ║nā-amaga ╪Hôan tsî Proxramgu !âb !nâ ge ╪gāhe. !Gâi!gâ tsîb ge ║îba ║khā║khākhâis ׀khab ge  tsoatsoas khao!gâ ׀nai ║îb kurisan ׀kha ╪hôana ôas ai !khō║­nâ-ūxūn ׀kha ge ╪oa hâ i. ║Îb ge a !âu ║oa mâ║aeb aitsama nē !khō║nâ-ūxūna nî sîsenūsa.

!Nona║î ╪hôa╪ui-aos, 22 kurixa Cwis, ­║îs hoan xa a ╪khams, ge ╪khamkhoen saoguga !Ah ╪Hôa╪gares tawa !khōdana hâ. ║Îs ge ╪khamkhoesiba ׀hûhâsib !nâ ra tsâ׀khā ║hōn ╪namipe proxramga !am║are tsî gagasi ׀ōn tsîna ra ╪gâxa-ū. “Tita ge ti sîsenna kaise a ׀nam,” tis ge ra mî. “╪Gomsen ║oa ta ase ta ge ׀Ae║gams !nâ hâs nēsa kaise ra ׀gapi!gôa. !Gâise ra tsâ kai te !khais ge ti sîsen║are-aon ׀Ae║gams !nâ hân hoana ta nî ╪ansa. Tsumkwesa xu ta ti sîsen║are-aon domga ra ║nâu, o ta ge a mî ║oa tari-i a tarisa, o ta ge a ╪ann tsî oasī tsî ta ga naupa o nî  ╪an tarin a !khaisa.”Nē ║goe-oa tama Cwis hîa 2007║î kurib ai ge NBCs tawa a sîsentsoatsoas tsîn ge ╪Hôan tsî Proxramgu !âb !nâ hâ tsîs ge ׀nai ╪hôa╪gares ai ׀nî sîsen║are-ao-i ׀kha ge ╪oa hâ i. Nē ╪hôa╪ui-aob xas ge ­║îsa mâtits ╪hôana ra !am║aresa ra ║gau!nâhe tsî ׀gū║ae dommi !âidi ׀kha a tsoatsoa ║khā.

“Tita ge ti ׀hûhâsib ╪nīsasib ase xū-e ra dī ╪gao, ai║gause īsi╪hôa╪gares ai hâs khami. Tita ge ti ׀hûhâsib ׀gôaron dommi âtab ׀guiba ║nâu tide, xawen mûtes tsîna nî hî !khaisa ra ║khore tsî ║nā ║goa╪uis ai nî sîsen.”

Hoa !nona ╪hôa╪ui-aon ge ra ╪gom, NBCs kaise ╪hâ╪hâsa !âsa ra ׀hurusa omkhâisens !âb !nâ. “Sida khoen ge ­║în hoan xa khaohâ kaihe hâ khoena. Sida khoen ge taren ­nau !âgu Namibiab di gu !nâ ra ī !khais tsîna ge ׀ū i, xawen ge ╪hôa╪gare !oabas !khō!oas !nâ-ū ûib tsî !nae!khain xa ╪ansa ra hō. NBCs !nâ-ūn ge ║khā║khādi tsî ║gau!nâde ra !khō!oa. Nēb ge ׀gaub NBCs !hūb ║angāsaben xa ra ╪âi tsî ûi╪uiba, ׀gui-i tsîna ║ara╪ui tamase,” tis ge Cwisa ge ׀am׀am.