RUNDU-Kukwama tupu apa kavagwene mbapira zina kuvapa asi vahepa kuhageka kurandesera mononzira dodoropa zaRundu, vaporosi womoKavango, modoropa zaRundu kukwama nye etokoro lyondango zodoropa kavatokwere kuvatjinda pomavango ogo gakara ava randesere pwahana asi paveta. Ano varandesi nye ava kapi kavatambwire etokoro lyangesi noureru. Awo kavagenderere kulizigida makura kumwe nokuturapo elyatero vaze komberewa zovakansela wondango zodoropa omu kava kapongere pevengo olyo ure wonovili ntatu omu kavandindilire asi mukurona godoropa ndi gumwe gomomberewa ozo aya gave  elimbururo.

 Mukurona godoropa Hilka Levi, ogu gakara asi mberewa zendi kwakara kosipangero saRundu sepangero, apa nye kavayigwene oyo valyateli yipo nye kavatokwere kuza komberewa zomukuronagendesi pamberewa munekuto Romanus Haironga, nokuhundira asi gahepa kuvapa elimbururo asi morwa sinke vanakuvatjidira pomavango gokurandesera moyitara. Konyima tupu zokukara pomberewa zaHaironga yipo kapwege nokuyavatantera asi “ame kapisi mukurona godoropa, ame munamberewa tupu. Haironga kavatanterere asi elikwamo eli kuna kara lyoupolitika yipo asi valyateli ava vahepa kuza komukurona godoropa. Mokukwama valyateli awo kavatente asi esi kapisi sikando sokuhova yina kuhoroka eyi yokuvatjida moyitarata.

Nampili ngomu asi mukurona godoropa kwavatumbwidilire kapi kasikisiremo etumbwidiro. Vamwe valyateli kavatente asi awo kuna kara nowoma wokuza positanda morwa poyitanda kuna karapo maurudi. Awo kavatente asi positanda pwato mavango gokurandesera mavango nagenye ganazura. Sirongo Namibia nare samanguruka, vakansela novaporosi kuna hara kureta mukaro ogu ngavaruganesa ava ngavatukoronyeke, mokusininika vantu vahana kuhara. yimo ana kutanta gumwe govalyateli.

Sinzi sovantu ava randesa ngesefa ezi awo kuna hara kurandesera mononzira morwa nsene komavango gopeke hawe kapi tavagwana yimaliva kovarandi vawo eyi navakaruganesa asi vakarereseko ekoro lyawo ntani awo simpe kufuta mukuli kondango zodoropa. Awo simpe kavageve egano asi ndango zodorpa zahepa kureta evango lyovanataxi pepi nawo yipo asi varete varandi pepi nawo. Ano vamwe asi ngesefa zawo kapi tazikara pevango limwe vahepa kugendagura yipo vapapare varandi. Mokukwama gumwe gwawo Paulus Ndala, age kuna kuyimona asi eli elikwamo lyawo lyavatumbukira varandese yipo vagwanenemo nsonso morwa awo kapi avarugana. Ndala, katente asi age kapi tavhuru kufuta mukuli gopositanda,yipo asi age gahepa kurandesa nye mononzira omu vana kugenda varandi. Awo kuna hara asi evango lyovanaTaxi vahepa kulireta pepi nositanda yipo asi varandi vayavature pepi nawo. Mukurona govaporosi momukunda komisaregona Petrus Shigwedha, kavatanterere asi eyi vana kurugana kuna kara paveta,nsene kapi vana kuhageka awo kuvhura varuganese yirwisogona mokuvagusapo. Ame kunakuzuvha eyi muna kuuyunga eyi nomurugana gaveni magano geni makura mutengure mukaturemo mahundiro nokukarugana ngesefa zopaveta positanda. yimo ana kutanta Shigwedha. Malyateli yipo nye kavatokwere kulyatera vaze kositanda saRundu ,mekeverero lyovaporosi. Mosiruwo nye oso kayikere ngoso muporosi gara gumwe kavamuremekere apa kamuzugumine gumwe gwawo nemanya nokuremana keho.

Mokukwama mugendesi positanda saRundu, Rafael Kampanza, katente asi valyateli ava kapi vahara kukwama ngendeseso esi zakarapo omu muntu nogwana evango lyokurandesera. Kampanza kapatanene nombudi asi yitanda nayinye yomoRundu, kwato mavango gongesefa. Age  katente asi kuna karako mavango gokusika ko330 nsene opakerera yitanda yitatu yomoRundu.Age katente asi udigu wovantu ava nare watameka kutunda tupu mo1995.Ndango zodoropa kwatokora kugwedererako nomudwire dimwe positanda saRundu, nye owo nye wokurandesera nkenye oku vanahara owo kapi vanahara oyo. Yiwo udigu twakara nawo owo.