KATIMA MULILO-Nguuru gomukunda Caprivi Lawrence Sampofu moutano kapupwire nage kalihameserere mowo kavakere tavagava marunyegenyo konombudi dona edi kadi pwege dinapili madina kutunda konofunguna dopombunda edi kavageve konyima tupu vantu apa kavazuvhire asi Felix Mukupi anadogoroka mehudi lyehauto.

Nguuru gomukunda kageve mbudi zendi posiruwo oso kauuyungisire mayovi govantu woruguwo, vamwe kavahamenenemo kavakere Vaministera ntani navamwe vakondi megedeso epangero lyaNamibia, ava kavazwidire emunzugo lyokupongera vantu lyaNgweeze, moKatima Mulilo.

Ose ngovatungimo momukunda gwaCaprivi kuna tugumu nomfa edi nosituku tjima, kukora ntani nokuyipurasi asi Mukupi ana tusigi mosiruwo sosisupi esi, age kadogorokere momapeu 16 June 2012.Kulirwanesa nyamwetu nanyamwetu kwato eyi nayikwasa. Twahepa kuhageka eyi yokukuna mbuto zondona zorutandu mokatji ketu,twahepa kulipakerera kumwe tulireni  mukwetu ogu ana tusigi Hon Felix Mukupi, nefumadeko, twahepa kuhageka nombudi dona edi tuna kara nado.

Nombudi dona kuna kututwara tupu tukaligaunuke yipo asi ose tukareni gomuhoko gumwe guna kulira gwetweni. yimo ana kutanta Sampofu. Nkenye apa twahepa kukara ntani kuruganesa nonkango dina dokuhengagwida yimo ana kutantera ngoso ava kavakerepo kumwe novaMinistera ngwendi Ministera gepopero Nangolo Mbumba, Ministera Jery Ekandjo, Ministera Dr Alberrt Kawana naMinistera Richard Kamwi.

Vamwe vanekuto kavakerepo kuna kara Minsitera Doreen Sioka, Mukurona goropa zaKatima MuliloJohn Likando, Ntani Comrade Helmut Angula naNdokotora Joseph Discho. Age kagusire nonkango dina kara movaRoma,3. 10. Sampofu katente asi kwato muhungami Hon Mukupi gahepa kukasika pevango pwizumukiro. Age kahundilire vantu vatunga momukunda gwina asi vahepa kuvatera epangero mokugwana mutoti nombudi dona edi kavaruganesere nomukumutumbura asi muntu gwangesi muna woma ngwendi embungu tupu lyalipwira.

Ogu kakwetesereko mbudi zaSampofu kakere George Simataa hamutjanga gokukarereramo moministeli zovarugani ogu kakere asi age kapi kaminine nkango nampilizimwe. Age katente asi kuna kumoneka asi koveli vantu moomu tuna kara vadiva asi nomfa yinke ntani awo kuvhura vadiva nsene muntu ana fu ntudi kuna muli. Ezuva eli kafire muna vantu ogu nombudi yipo kutammeka dilihanene mwaza sirongo nokutuma nye nosms noponze zosirongo. Kovatoti nye wonombudi edi ame kapi nina kumona asi kuvhura kuvatumbura asi nawo vantu.Awo kavalikidire mukaro gwawo dona komuhoko gwaNamibia.

Awo kapi vanadipaga Mukupi moomu kavagazarere, nyeawo kuna moneka asi mavaya ntani kuna likida muhoko asi awo konyima vana kara kapi vana kuza komeho. yimo ana kutanta ngoso hamutjanga gokukareremo kovantu ava kavakerepo tavalili. Hompa George Simasiku Mamili vii, katente asi rudi rovamafwe nawo kavagwene mbudi ezi asi koveli vana kutuma nosms donondona edi dina kara asi kuna kuzonagura mukaro momukunda omu kavageve asi mukupi eyi kareta momukunda ogu yidona yokuhamena kekuliko. Ekuliko eli gareta Mukupi kunakumoneka moNamibia namunye kapisi asi momukunda horowero gwendi gwelike.

Ministera godoropa nonomukunda, mambo nekuliko nomukunda doponze zodoropa jerry Ekandjo nage kageve mbudi zendi.Ame kwayadiva Mukupi asi muuyungi gomunene,unene kuhamena nomukaro dekuliko momukunda gwendi ntani mukunda nye nagunye gwaCaprivi. Siruwo nasinye atukara moyigongi kumoneka asi Mukupi kapi aroroka ntani munapolitika. Usko Nghaamwa, nguuru gomukunda Ohangwena katjangwilire Mukupi asi gumwe gakara tavatere vantu navenye kapisi womomukunda horowero gwendi gwelike. Age katente asi Namibia kuna zumbanesa mugara ano apa na hulire kapi yina kutanta asi kapi vana kutwikirapo.

Mukarelipo gombunga zaRed Cross moNamibia, nage kageve asi pa nye vayadiva Mukupi hawe yirugana yanakufa kapi tavavhuru kuyitjangurura. Age kwalituliremo unene ramabngako noprojeka edi ngarugana Red Cross, Mukupi nage kumumona taviyauka.

Komeho vakamene kulira muntu ogu mukurona godoropa zaKatima Mulilo katente asi awo tavakatumbura evango limwe ndi nzira zimwe Edina lyana kufa ogu, gakere asi munangesefa ntani muna politika. Nakufa Mukupi kuna sigi vana vendi ntantatu ntani kuna sigi ugawo wendi, ou kawekere age simpe muzuni.